୮୦ ବର୍ଷ ବୟସରେ ବିଧାୟକ ହେବା ପାଇଁ ପ୍ରଥମ ନିର୍ବାଚନ ଲଢ଼ୁଛନ୍ତି ବାଲେଶ୍ୱରର ବେଣୁଧର

ଉପନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବରେ ନାମାଙ୍କନ ଦାଖଲ କରି ପ୍ରଚାର ଆରମ୍ଭ କରିଥିବା ବେଣୁଧର ପେଶାରେ ଜଣେ ବାରିକ । ଲୋକଙ୍କ ବାଳ କାଟି ସେ ପେଟ ପୋଷନ୍ତି । ସେ ଅନେକ ବର୍ଷ ହେବ ବସ୍ତି ବାସିନ୍ଦାଙ୍କ ଅଧିକାର ପାଇଁ ଲଢ଼େଇ କରି ଆସିଛନ୍ତି ।

୮୦ ବର୍ଷ ବୟସରେ ବିଧାୟକ ହେବା ପାଇଁ ପ୍ରଥମ ନିର୍ବାଚନ ଲଢ଼ୁଛନ୍ତି ବାଲେଶ୍ୱରର ବେଣୁଧର
ନିଜ ପାଇଁ ପ୍ରଚାର କରୁଛନ୍ତି ୮୦-ବର୍ଷୀୟ ବେଣୁଧର ବାରିକ (ବାମରୁ ଦ୍ୱିତୀୟ)।
  • News18 Odia
  • Last Updated: October 20, 2020, 11:59 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ବାଲେଶ୍ୱର: ତାଙ୍କ ବୟସ ୮୦ ବର୍ଷ, ହେଲେ ବିଧାୟକ ହୋଇ ସମାଜରେ ଜରୁରୀ ପରିବର୍ତ୍ତନ ଆଣିବାର ନିଜ ଇଚ୍ଛାକୁ ପୂରଣ କରିବାକୁ ସେ ଏବେ ଆଗେଇ ଆସିଛନ୍ତି । ଜୀବନ ସାରା ନିଜ ସ୍ୱଳ୍ପ ଆୟରୁ ଯାହା କିଛି ଅର୍ଥ ସଞ୍ଚୟ କରି ରଖିଥିଲେ ତାହା ଖର୍ଚ୍ଚ କରି ବାଲେଶ୍ୱର ସଦର ପାଇଁ ହେବାକୁ ଥିବା ବିଧାନ ସଭା ଉପନିର୍ବାଚନରେ ପ୍ରତିଦ୍ବନ୍ଦିତା କରୁଛନ୍ତି ବେଣୁଧର ବାରିକ ।

ଏହି ଉପନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବରେ ନାମାଙ୍କନ ଦାଖଲ କରି ପ୍ରଚାର ଆରମ୍ଭ କରିଥିବା ବେଣୁଧର ପେଶାରେ ଜଣେ ବାରିକ । ଲୋକଙ୍କ ବାଳ କାଟି ସେ ପେଟ ପୋଷନ୍ତି । ଯେଉଁ ବୟସରେ ଚାଲି ଚାଲି ପାଦ ଥକି ପଡ଼ିବା କଥା ସେହି ବୟସରେ ବି କମିନି ତାଙ୍କ ମନରେ ଥିବା ସାମାଜିକ ପରିବର୍ତ୍ତନ କରାଇବାର ଇଚ୍ଛା । ନଇଁ ଗଲାଣି ଅଣ୍ଟା । ଶଳଖି ଛିଡା ହେବା ପାଇଁ ସଙ୍ଘର୍ଷ କରିବାକୁ ପଡୁଛି । ହେଲେ କମିନାହିଁ ମନରେ ଉତ୍ସାହ ।

ନାମାଙ୍କନ ଦାଖଲ କରି ସାରି ଚୁପ ହୋଇ ବସି ନାହାନ୍ତି ବେଣୁଧର । ନିଜର ଦୁଇ ତିନି ଜଣ ବନ୍ଧୁଙ୍କୁ ଧରି ଘର ଘର ବୁଲି ନିଜ ପାଇଁ ଭୋଟ ମଧ୍ୟ ମାଗୁଛନ୍ତି ସେ । ସମାଜକୁ ପରିବର୍ତ୍ତନ କରିବା ଓ ଗରିବ ଲୋକଙ୍କ ପାଇଁ ସରକାରୀ ସାହାଯ୍ୟ ସୁନିଶ୍ଚିତ କରାଇବା ପ୍ରତିଶୃତି ନେଇ ସେ ପ୍ରଚାର ଆରମ୍ଭ କରିଦେଇଛନ୍ତି ।

ଜଣେ ବ୍ୟକ୍ତିଙ୍କୁ ଖିଅର କରୁଛନ୍ତି ବେଳେ ବେଣୁଧର ବାରିକ ।


ଏହା ବି ପଢ଼ନ୍ତୁ କି ସାହସ! ରାସ୍ତାରେ ମୋବାଇଲ୍ ଛଡ଼ାଳିଙ୍କ ସହ ଲଢ଼ି ଝିଅଟି ଜଣକୁ ଧରିଲା; ଦେଖନ୍ତୁ VIDEO

ବେଣୁଧରଙ୍କର କୌଣସି ବଡ଼ ସେଲୁନ କିମ୍ବା ପାର୍ଲର ନାହିଁ । ସେ ରାସ୍ତା କଡ଼ରେ ଗଛ ମୂଳରେ ବସି ଲୋକଙ୍କୁ ଖିଅର କରନ୍ତି । ପ୍ରାୟ ୫୦ ବର୍ଷ ପୂର୍ବେ ସେ ବାହାନଗା ଅଞ୍ଚଳରୁ ବାଲେଶ୍ୱରର ଗୁଡ଼ିପଦାକୁ ଆସିଥିଲେ । ସେବେ ଠାରୁ ସେଇଠି ରହୁଛନ୍ତି ସେ । ପରିବାର କହିଲେ ଦୁଇ ଝିଅ ଓ ସାନ ଜ୍ୱାଇଁ ତାଙ୍କ ସାଥିରେ ରହନ୍ତି । ତାଙ୍କର ଦୁଇ ପୁଅଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ବେଳେ ଆଉ ଜଣେ ଭୁବନେଶ୍ୱରରେ ଅଲଗା ହୋଇ ରହନ୍ତି ।

ବେଣୁଧର ଦୀର୍ଘ ଦିନ ହେବ ବସ୍ତି ବାସିନ୍ଦାଙ୍କ ପାଇଁ ଲଢ଼େଇ କରି ଆସିଛନ୍ତି । ଏପରିକି ବାଲେଶ୍ୱର ମେଡିକାଲ କଲେଜ ପ୍ରତିଷ୍ଠା ନେଇ ଆନ୍ଦୋଳନ ଚାଲିଥିବା ବେଳେ ସେ ଆମରଣ ଅନଶନ କରିଥିଲେ । ଗରିବ ଲୋକଙ୍କ ସୁଖ ଦୁଃଖ ରେ ବେଣୁଧର ସାଥି ହୋଇ ରହିଆସିଥିବା ସ୍ଥାନୀୟ ଲୋକେ କହିଛନ୍ତି । ତେଣୁ ତାଙ୍କ ଗ୍ରାମବାସୀମାନେ ମଧ୍ୟ ତାଙ୍କୁ ବିଜୟୀ କରିବା ପାଇଁ ଭିଡ଼ିଛନ୍ତି ଅଣ୍ଟା । ପରିଣତ ବୟସରେ ବି ରାଜନୀତି ମାଧ୍ୟମରେ ସାମାଜିକ ପରିବର୍ତ୍ତନ ଆଣିବାର ତାଙ୍କ ଉଦ୍ୟମ ଏବେ ସବୁଠି ଚର୍ଚ୍ଚାର ବିଷୟ ହୋଇଛି ।

ବିଭିନ୍ନ କ୍ଷେତ୍ରରେ ବେଣୁଧର ପାଇଥିବା ପୁରସ୍କାର ଓ ମାନପତ୍ର


ଏହା ବି ପଢ଼ନ୍ତୁ ୭ ବର୍ଷର ବାଳକ ଭୋକରେ ମରିଗଲା; ତାମାମୃତ ଦେହ ପାଖରେ ୩ ଦିନ ବସିରହିଲା

‘‘ମୋ’ ପାଖରେ ଅର୍ଥ ନାହିଁ । ବଡ଼ ବଡ଼ ନେତାଙ୍କ ଭଳି ଦାମୀ ଗାଡ଼ି ନାହିଁ ବା ପ୍ରଚାର କରିବା ପାଇଁ ଆବଶ୍ୟକ ସାଧନ ନାହିଁ । ହେଲେ ବିଶ୍ୱାସ ରହିଛି ଜିତିବା ନେଇ । ଲୋକଙ୍କ ପାଇଁ ମୁଁ କାମ କରିଆସୁଛି । ମୋ’ର ବୟସ ଅଧିକ, କିନ୍ତୁ ମୋ’ ମନୋନବଳ ଭାଙ୍ଗିନି । ଖିଅର କରି ଯେଉଁ ଟଙ୍କା ସଞ୍ଚୟ କରିଥିଲି ସେଇଥିରେ ନାମାଙ୍କନ କରିଛି । ଏବେ ଦୁଇ ସାଥୀଙ୍କୁ ଧରି ପ୍ରଚାର କରୁଛି,’’ କହିଛନ୍ତି ବେଣୁଧର ।



ସ୍ଥାନୀୟ ଗ୍ରାମବାସୀ ଲକ୍ଷ୍ମୀପ୍ରିୟା ବେହେରା କହିଛନ୍ତି ଯେ ଗାଁର ଲୋକେ ବେଣୁଧରଙ୍କୁ ଅକୁଣ୍ଠ ସମର୍ଥନ କରୁଛନ୍ତି । ‘‘ଆମ ସମର୍କୀୟମାନଙ୍କୁ ମଧ୍ୟ ଆମେ ତାଙ୍କୁ ସମର୍ଥନ କରିବା ପାଇଁ ଅନୁରୋଧ କରିବୁ । ସେ ସବୁବେଳେ ଆମର ସୁଖ ଦୁଃଖରେ ଛିଡ଼ା ହୋଇଛନ୍ତି । ଏପରିକି କୌଣସି ଅସୁବିଧା ହେଲେ ଘର ଆଗରେ ଦିନ ନାହିଁ ରାତି ନାହିଁ ବେଣୁ ମଉସା ଛିଡ଼ା ହୋଇଥିବେ । ଏଭଳି ପ୍ରାର୍ଥୀ ବିଜୟୀ ହେଲେ ଆମର ଦୁଃଖ ଦୂର ହେବ,’’ ସେ କହିଛନ୍ତି ।
Published by: Anand Shankar Thankur Das
First published: October 20, 2020, 11:59 PM IST
corona virus btn
corona virus btn
Loading