ପ୍ରେମ ସପ୍ତାହରେ ସାଜିଲେ ଉଦାହରଣ; ମୃତ୍ୟୁ ପରେ ବି ଛାଡିଲେନି ପତ୍ନୀଙ୍କ ହାତ

News 18 Odia Digital

କୋରାପୁଟ: ଚାଲିଛି ପ୍ରେମର ସପ୍ତାହ, ପ୍ରେମୀ ଯୁଗଳମାନେ ଏହି ସପ୍ତାହକୁ ଖୁବ ଉତ୍ସାହର ସହ ପାଳନ କରୁଛନ୍ତି । କିନ୍ତୁ ଏହାରି ଭିତରେ ଏକ ଅଭାବନୀୟ ଦୃଶ୍ୟ ସାମ୍ନାକୁ ଆସିଛି । ପତ୍ନୀଙ୍କ (Wife) ମୃତ୍ୟୁ ପରେ ମଧ୍ୟ ତାଙ୍କୁ ସାଥୀରେ ନେଇ ନିଜ ପ୍ରେମକୁ ସମ୍ମାନ ଦେଇଛନ୍ତି ଜଣେ ବ୍ୟକ୍ତି ।

କୋରାପୁଟର (Koraput) ଗୁରୁ ନାମକ ବ୍ୟକ୍ତି ଜଣକ ଆନ୍ଧ୍ର ପ୍ରଦେଶର ବିଶାଖାପାଟନମରେ ଶ୍ରମିକ ଭାବରେ କାମ କରୁଥିଲେ । ସେଠାରେ ତାଙ୍କ ପତ୍ନୀଙ୍କର ଶାରୀରିକ ଅସୁସ୍ଥତା ଦେଖାଦେଇଥିଲା । ପରେ ନିକଟସ୍ଥ ଏକ ଘରେଇ ଚିକିତ୍ସାଳୟରେ ତାଙ୍କୁ ଭର୍ତ୍ତି କରିଥିଲେ ଗୁରୁ । ପାଖରେ ଥିବା ସମସ୍ତ ଟଙ୍କା ଖର୍ଚ୍ଚ ହୋଇଥିଲେ ମଧ୍ୟ କୌଣସି ଲାଭ ମିଳିନଥିଲା । ସମସ୍ତ ଉଦ୍ୟମ ସତ୍ତ୍ୱେ ନିଜ ପତ୍ନୀଙ୍କର ଦେହାନ୍ତ ହୋଇଥିଲା । ତେବେ ପାଖରେ ଟଙ୍କା ନଥିବାରୁ ଅନ୍ୟଠାରୁ ସହାୟତା ଆଶା କରିଥିଲେ ଗୁରୁ । କିନ୍ତୁ କୌଣସି ସହାୟତା ମିଳିନଥିଲା । ଶବବୁହା ଗାଡିରେ ପତ୍ନୀଙ୍କୁ ନେବା ପାଇଁ ଟଙ୍କା ନଥିବାରୁ ନିଜ କାନ୍ଧରେ ପତ୍ନୀଙ୍କୁ ପକାଇ ଆନ୍ଧ୍ର ପ୍ରଦେଶରୁ ଓଡ଼ିଶା ଆସୁଥିଲେ ଗୁରୁ । ତେବେ ରାସ୍ତାରେ ତାଙ୍କୁ ପୋଲିସ ଅଟକାଇଥିଲା ଓ ସାହାଯ୍ୟ ମଧ୍ୟ କରିଥିଲା । ସେତେବେଳକୁ ପ୍ରାୟ ୩୦କିମିରୁ ଉର୍ଦ୍ଧ୍ୱ ବାଟ ଚାଲିଆସିଥିଲେ ଗୁରୁ । ପୋଲିସ ଏକ ଶବବୁହା ଗାଡି ତାଙ୍କ ପାଇଁ ଯୋଗାଡ କରି କୋରାପୁଟ ହସ୍ପିଟାଲକୁ ଶବ ବ୍ୟବଚ୍ଛେଦ କରିବା ପାଇଁ ପଠାଇଥିଲା ।

ପୂର୍ବରୁ ମଧ୍ୟ କଳାହାଣ୍ଡିରୁ ଏପରି ଏକ ଘଟଣା ସାମ୍ନାକୁ ଆସିଥିଲା । ଦାନ ମାଝୀଙ୍କ ଖବର ରାଜ୍ୟ ତଥା ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଥିଲା । ନିଜ ପତ୍ନୀଙ୍କ ମୃତ୍ୟୁ ପରେ ଦାନ ମାଝୀ ମଧ୍ୟ ମୃତ ଦେହକୁ ହସ୍ପିଟାଲରୁ ନିଜ ଗାଁକୁ କାନ୍ଧରେ ବୋହି ନେଇଥିଲେ ।