ଆଠ ବର୍ଷର ଏଇ ପ୍ରତିଭାବାନ ମୃଦଙ୍ଗ ବାଦକ ଜନ୍ମରୁ ଅନ୍ଧ, ସରକାରୀ ସହାୟତାକୁ ଚାହିଁ ବସିଛନ୍ତି

ଚତୁର୍ଥ ଶ୍ରେଣୀରେ ପଢ଼ୁଥିବା ଦିବ୍ୟରଞ୍ଜନଙ୍କୁ ଭୁରିଭୁରି ପ୍ରଶଂସା ମିଳୁଛି, ହେଲେ ସେ ମୃଦଙ୍ଗ ବଜେଇ ପେଟ ପୋଷୁଛନ୍ତି

ଆଠ ବର୍ଷର ଏଇ ପ୍ରତିଭାବାନ ମୃଦଙ୍ଗ ବାଦକ ଜନ୍ମରୁ ଅନ୍ଧ, ସରକାରୀ ସହାୟତାକୁ ଚାହିଁ ବସିଛନ୍ତି
ବାପା ବାଳକୃଷ୍ଣଙ୍କ ସହ ଦିବ୍ୟରଞ୍ଜନ ।
  • News18 Odia
  • Last Updated: October 30, 2019, 5:33 PM IST
  • Share this:
  • Byline Facebook
  • Byline Twitter
  • Byline Linkedin
ମାଲକାନଗିରି: କଳା ପାଇଁ ଯେ କିଛି ପ୍ରତିବନ୍ଧକ ନ ଥାଏ – ନା ବୟସର ନା ବିଧାତାର ଅଭିଶାପର – ଏ କଥାକୁ ସତ ବୋଲି ପ୍ରମାଣ କରି ଦେଖାଇଛନ୍ତି ମାଲକାନଗିରି ଜିଲ୍ଲା ମାଥିଲି ବ୍ଲକ୍‌ର ଜଣେ କୁନି ପିଲା।

ମାତ୍ର ଆଠ ବର୍ଷ ବୟସର ଦିବ୍ୟରଞ୍ଜନ କର୍ଷାନି। ଚତୁର୍ଥ ଶ୍ରେଣୀରେ ପଢ଼ନ୍ତି । ଜନ୍ମରୁ ସେ ଅଧାରୁ ବେଶୀ ଅନ୍ଧ । ହେଲେ ସେ ଏତେ ସୁନ୍ଦର ମୃଦଙ୍ଗ ବଜାନ୍ତି ଯେ ଆଖପାଖ ଅନେକ ଗାଁରେ ତାଙ୍କର ସୁନାମ ବ୍ୟାପ୍ତ । ସେ ଯେତେବେଳେ ତନ୍ମୟ ହୋଇ ମୃଦଙ୍ଗ ବଜାଉଥାନ୍ତି, ତାଙ୍କ ପଛରେ ତାଙ୍କ ବାପା ବାଳକୃଷ୍ଣ ବସି ତାଳ ଦେଉଥାନ୍ତି । ଏ ଦୃଶ୍ୟ ଦେଖିବାକୁ ଖଡ଼ିମାଟି ଗାଁରେ ଥିବା ତାଙ୍କ ଘରେ ଜମା ହୋଇଯାଆନ୍ତି ଅନେକ ଲୋକ । ଏତେ ସାନ ପିଲାଟିର ଏମିତି ପ୍ରଖର ପ୍ରତିଭାକୁ ସମସ୍ତେ ଖୁବ୍‌ ପ୍ରଶଂସା କରନ୍ତି ।

ସମସ୍ତଙ୍କ ଠାରୁ ଆଦର ପାଉଛନ୍ତି  ଦିବ୍ୟରଞ୍ଜନ, ହେଲେ କେବଳ ସେଇ ଆଦରରେ ତାଙ୍କ ପରିବାରର ପେଟ ପୋଷିବା ଅସମ୍ଭବ ହୋଇପଡ଼ିଛି । ପରିବାରଟି ଭାରି ଗରିବ । ତାଙ୍କ ଘରଟି ଧସରା ମାଟି ଓ କୁଡ଼ିଆରେ ତିଆରି ।

ଦିବ୍ୟରଞ୍ଜନଙ୍କ ଆଖିକୁ ଭଲ ଭାବେ ଦେଖା ଯାଉ ନଥିବା ସତ୍ୱେ ଓ ସେ ଏଇ ବାଲ୍ୟ କାଳରୁ ଅନନ୍ୟ ପ୍ରତିଭାର ଅଧିକାରୀ ହୋଇଥିବା ସତ୍ୱେ ସରକାରଙ୍କ ତରଫରୁ ତାଙ୍କୁ ଏ ପର୍ଯ୍ୟନ୍ତ କୌଣସି ସାହାଯ୍ୟ ମିଳି ନାହିଁ ।

ସାହାଯ୍ୟ ପାଇବା ତ ଦୂରର କଥା, ନିଜେ ବାଜା ବଜେଇ ପେଟ ପୋଷୁଛନ୍ତି ଦିବ୍ୟରଞ୍ଜନ । ବାପା ବାଳକୃଷ୍ଣ ଲୋକଙ୍କୁ ନାମ ସଂକୀର୍ତ୍ତନ ଶିଖେଇବା ସହ କୁଲି ମଜୁରିଆ କାମ କରି ଘରକୁ ଦି ପଇସା ଆଣନ୍ତି । ହେଲେ ସେତିକି ପଇସାରେ ଘର ଚଳେଇବା କଷ୍ଟ ହୁଏ ।

ସବୁଠୁ ଭଲ କଥା ଏହା ଯେ ଏତେ ଅଭାବ ଅନଟନ ମଧ୍ୟରେ ବି ଦିବ୍ୟରଞ୍ଜନ ପାଠ ପଢ଼ାରେ ହେଳା କରନ୍ତି ନାହିଁ । ପ୍ରତି ଦିନ ସେ ପଢି଼ବାକୁ ସ୍କୁଲ ଯାଆନ୍ତି । ପାଠ ପଢ଼ି ନିଜ ଗୋଡ଼ରେ ନିଜେ ଠିଆ ହେବେ ଓ ଦିନେ ବଡ଼ ମଣିଷ ହେବେ ବୋଲି ସେ କହିଛନ୍ତି ।

ଏ ସମ୍ପର୍କରେ ମାଥିଲି ବିଡିଓ ଆଶିଷ ଭୋଇଙ୍କ ଧ୍ୟାନ ଆକର୍ଷଣ କରାଯିବାରୁ ସେ କହିଛନ୍ତି କହିଛନ୍ତି ଯେ ପ୍ରଶାସନ ଦ୍ୱାରା ନିୟମ ଅନୁସାରେ ଦିବ୍ୟରଞ୍ଜନଙ୍କୁ ସାହାଯ୍ୟ ଯୋଗାଇ ଦେବା ପାଇଁ ସେ ନିଶ୍ଚିତ ଚେଷ୍ଟା କରିବେ ।

ଦିବ୍ୟରଞ୍ଜନଙ୍କୁ ଦେଖି ଅନେକଙ୍କର ମନେହୁଏ ସତେ ଯେମିତି ବୟସ ଓ ଆର୍ଥିକ ଅବସ୍ଥାର ତାରତମ୍ୟରେ ସେ ଫସି ଯାଇଛନ୍ତି । ତେବେ ବିଡିଓଙ୍କ ପ୍ରତିଶୃତି ତାଙ୍କ କଅଁଳ ମନରେ ଅଶୁମାରୀ ଆଶା ସଞ୍ଚାର କରିଛି ।
First published: October 30, 2019, 5:33 PM IST
corona virus btn
corona virus btn
Loading