ଗାମ୍ବିଆରେ ୬୬ ପିଲାଙ୍କ ମୃତ୍ୟୁ ପରେ ଓଡ଼ିଶାରେ ନମୁନା ସଂଗ୍ରହ ପାଇଁ ଡିଆଇଙ୍କୁ ନିର୍ଦ୍ଦେଶ

News 18 Odia Digital

ଭୁବନେଶ୍ୱର: ବିଶ୍ୱ ସ୍ୱାସ୍ଥ୍ୟ ସଂଗଠନ ଭାରତରେ ନିର୍ମିତ ଚାରିଟି କଫ୍ ସିରପ ବିରୁଦ୍ଧରେ ସତର୍କ ସୂଚନା ଜାରି କରିବା ପରେ ସେଣ୍ଟ୍ରାଲ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟ୍ରୋଲ ଅର୍ଗାନାଇଜେସନ୍ (ସିଡିଏସକୋ) ଏକ ତଦନ୍ତ ଆରମ୍ଭ କରିଛି ଯାହା ଆଫ୍ରିକୀୟ ଦେଶ ଗାମ୍ବିଆରେ ତୀବ୍ର କିଡନୀ ରୋଗ ଏବଂ ୬୬ ଜଣଙ୍କ ମୃତ୍ୟୁ ସହ ଜଡିତ ହୋଇପାରେ।

ଓଡ଼ିଶାରେ ମଧ୍ୟ ଡ୍ରଗ୍‌ ଇନ୍‌ସପେକ୍ଟର (ଡିଆଇ)ମାନଙ୍କୁ ସେହି କମ୍ପାନିର କଫ୍ ସିରପ୍ ବିକ୍ରି ହେଉଛି ନା ନାହିଁ ତାହାର ଯାଞ୍ଚ କରିବା ପାଇଁ ନିର୍ଦ୍ଦେଶ ଦିଆଯାଇଛି। ସୂଚନା ଅନୁଯାୟୀ, ରାଜ୍ୟରେ ଏହି କମ୍ପାନିର କଫ୍ ସିରପ୍ ଏବେ ବଜାରରେ ମିଳୁ ନାହିଁ। ପୂର୍ବରୁ ମଧ୍ୟ ଏହି କମ୍ପାନିର ସିରପ୍ ଯୋଗାଣ ନେଇ କୌଣସି ଘଟଣା ସାମ୍ନାକୁ ଆସିନାହିଁ। ଅନୁସନ୍ଧାନ ପରେ ସବୁକିଛି ସ୍ପଷ୍ଟ ହୋଇପାରିବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।

ଚାରୋଟି ଉତ୍ପାଦର ନମୁନାଗୁଡିକର ଲାବୋରେଟୋରୀ ବିଶ୍ଳେଷଣ ନିଶ୍ଚିତ କରିଛି ଯେ ଏଥିରେ ବହୁ ପରିମାଣର ଡାଏଥାଇଲନ୍ ଗ୍ଲାଇକଲ୍ ଏବଂ ଇଥିଲିନ୍ ଗ୍ଲାଇକଲ୍ ଅଛି। ଉତ୍ପାଦ ସହିତ ଜଡିତ ଥିବା ବିପଦକୁ ବର୍ଣ୍ଣନା କରି WHO କହିଛି ଯେ ଡାଇଥାଇଲନ୍ ଗ୍ଲାଇକଲ୍ ଏବଂ ଇଥିଲିନ୍ ଗ୍ଲାଇକଲ୍ ଖାଇବା ଦ୍ବାରା ମଣିଷ ପାଇଁ ବିଷାକ୍ତ ଏବଂ ଏହା ସାଂଘାତିକ ପ୍ରମାଣିତ ହୋଇପାରେ।