ନୀଳାମ୍ବୁ ଚିଲିକାରେ ପକ୍ଷୀ ସଂଖ୍ୟା ରେକର୍ଡ଼ ଭାଙ୍ଗିଲା, ହେଲେ ବର୍ଡ଼ ଫ୍ଲୁ ଆଶଙ୍କା ଚିନ୍ତା ବଢ଼ାଇଛି

News18 Odia Digital

ପୁରୀ: ଚିଲିକା ହ୍ରଦ ଓ ଆଖପାଖ ଅଞ୍ଚଳରେ ଚାଲିଥିବା ବାର୍ଷିକ ପକ୍ଷୀ ଗଣନା ସରିଛି । ଚିଲିକା ବନ୍ୟ ପ୍ରାଣୀ ବନଖଣ୍ଡକୁ ୧୯୦ ପ୍ରଜାତିର ୧୨ ଲକ୍ଷ ୪୨ ହଜାର ୮୨୬ଟି ପକ୍ଷୀ ଆସିଛନ୍ତି । ସେଠାରେ ଦୁଇଟି ବିଲୁପ୍ତ ପ୍ରଜାତିର ପକ୍ଷୀ ଚିହ୍ନଟ ହୋଇଛନ୍ତି । ଚଳିତ ବର୍ଷ ବିଦେଶାଗତ ପକ୍ଷୀଙ୍କ ସଂଖ୍ୟା ଗତ ବର୍ଷ ଓ ତା’ ପୂର୍ବ ଦୁଇ ବର୍ଷର ରେକର୍ଡ଼ ଭାଙ୍ଗିଛି ।

୨୦୨୦ରେ ୧୮୪ ପ୍ରଜାତିର ୧୧ ଲକ୍ଷ ୫ ହଜାର ୪୦ଟି ପକ୍ଷୀ ଆସିଥିଲେ । ବିଗତ ବର୍ଷ ତୁଳନାରେ ଚଳିତ ବର୍ଷ ୧,୩୭,୮୨୪ଟି ପକ୍ଷୀ ବଢ଼ିଛନ୍ତି।  ଅନୁକୁଳ ପରିବେଶ ଯୋଗୁଁ ପକ୍ଷୀଙ୍କ ସଂଖ୍ୟା ବୃଦ୍ଧି ପାଇଥିବା ବନ ବିଭାଗ ପକ୍ଷରୁ କୁହାଯାଇଛି ।

ଏହା ବି ପଢ଼ନ୍ତୁ | ଦ୍ୱିତୀୟ ନିର୍ଭୟା କାଣ୍ଡ: ମହିଳା ମନ୍ଦିରକୁ ପୂଜା କରିବାକୁ ଯାଇଥିଲେ; ପୂଜାରୀ ଓ ୨ ସାଥୀ ଅଭିଯୁକ୍ତ

ବମ୍ବେ ନ୍ୟାଚରାଲ୍‌ ହିଷ୍ଟ୍ରି ସୋସାଇଟିର ଡେପୁଟୀ ଡାଇରେକ୍ଟର ତଥା ବିଶିଷ୍ଟ ପକ୍ଷୀ ବିଶେଷଜ୍ଞ ଏସ୍‌. ବାଳଚନ୍ଦ୍ରନ କହିଛନ୍ତି ଯେ ଗତ ବର୍ଷ ଚିଲିକାକୁ ୧୬୧ଟି ପ୍ରଜାତିର ୧୦ ଲକ୍ଷ ୭୧ ହଜାର ୪୭୭ଟି ବିଦେଶୀ ପକ୍ଷୀ ଆସିଥିବା ବେଳେ ସ୍ଥାନୀୟ ୭୫ଟି ପ୍ରଜାତିର ୩୩ ହଜାର ୫୬୩ଟି ପକ୍ଷୀ ଆସିଥିଲେ। ଚଳିତ ବର୍ଷ ୧୧୧ଟି ବିଦେଶାଗତ ପ୍ରଜାତିର ୧ ଲକ୍ଷ ୨୦ ହଜାର ୪୩୫ଟି ପକ୍ଷୀ ଆସିଥିବା ବେଳେ ସ୍ଥାନୀୟ ୭୯ଟି ପ୍ରଜାତିର ୩୮ ହଜାର ୪୭୫ ପକ୍ଷୀ ଆସିଥିବା ରିପୋର୍ଟରେ ଉଲ୍ଲେଖ ରହିଛି ।



ଶୀତ ଋତୁ ଆସିଲେ ନିଳାମ୍ବୁ ଚିଲିକାରେ ବିଦେଶାଗତ ପକ୍ଷୀଙ୍କ ସମାଗମ ହୋଇଥାଏ । ଚିଲିକାର ପାଞ୍ଚଟି ରେଞ୍ଜ ଯଥା ବାଲୁଗାଁ, ସାତପଡ଼ା, ରମ୍ଭା, ଚିଲିକା ଓ ଟାଙ୍ଗୀ ରେଞ୍ଜରେ ପକ୍ଷୀ ଗଣନା ହୋଇଥିଲା । ପ୍ରତି ବର୍ଷ ଭଳି ଚଳିତ ବର୍ଷ  ଜାନୁଆରୀ ୫ରେ  ସକାଳ ୬ଟାରୁ ମଧ୍ୟାହ୍ନ ପର୍ଯ୍ୟନ୍ତ ଚାଲିଥିଲା ପକ୍ଷୀ ଗଣନା ।  ଚିଲିକା ଅଞ୍ଚଳରେ ପକ୍ଷୀଗଣନାରେ ୨୧ଟି ସାମିଲ ହୋଇଥିଲେ । ୧୯ଟି ଟିମ ଜଳ ଭାଗ ଏବଂ ଦୁଇଟି ଟିମ ସ୍ଥଳ ଭାଗରେ ଗଣନା କରିଥିଲେ।

ଏହା ବି ପଢ଼ନ୍ତୁ | ପତି ଘରକୁ ଡେରିରେ ଫେରିଲେ ବୋଲି ପତ୍ନୀ ରାଗରେ ତାଙ୍କ ମୁହଁରେ ଗରମ ତେଲ ଢାଳିଦେଲେ

‘‘ଏହି ପକ୍ଷୀଗଣନାରେ ଆମିଲଏଡ ଓଡ଼ିଶା, ବମ୍ବେ ନ୍ୟାଚରାଲ ହିଷ୍ଟ୍ରି ସୋସାଇଟି ଓ ଓୟୁଏଟି ସମେତ ବିଭିନ୍ନ ବିଶ୍ୱବିଦ୍ୟାଳୟର ପ୍ରଫେସର ଓ ଛାତ୍ରୀଛାତ୍ରୀମାନେ ସାମିଲ ହୋଇଥିଲେ । ପ୍ରତ୍ୟେକ ଗଣନାକାରୀ ଦଳକୁ ଗୋଟିଏ ଲେଖାଁଏ ଡଙ୍ଗା ଦିଆଯାଇଥିଲା । ପ୍ରତି ଟିମରେ ଜଣେ ଅଭିଜ୍ଞ ପକ୍ଷୀ ବିଶାରଦଙ୍କ ସମେତ ଚାରି ଜଣ ସହଯୋଗୀ ରହିଥିଲେ । ପ୍ରତ୍ୟେକ ଦଳକୁ ୱାକିଟକି, ବାଇନାକୁଲାର ଓ ଭିଏଚଏଫ ଆଦି ଯନ୍ତ୍ରପାତି, କିଟ୍‌ ବ୍ୟାଗ ଓ ପାଣି ବୋତଲ ଉପଲବ୍ଧ ରହିଥିଲା,’’ କହିଛନ୍ତି ବାଲୁଗାଁ ବନ୍ୟ ପ୍ରାଣୀ ଡ଼ିଭିଜନର ଏ.ସି.ଏଫ. ଶରତ ଚନ୍ଦ୍ର ମିଶ୍ର ।

ଏହା ବି ପଢ଼ନ୍ତୁ | ସିଗାରେଟ୍ ଟାଣିବାର ଆଇନଗତ ବୟସ ବଢ଼ି ୨୧ ହେବ; ଖୋଲା ସିଗାରେଟ୍ ବିକ୍ରି ବ୍ୟାନ୍ ହେବ; ଫାଇନ୍‌ ବଢ଼ିବ

ଚିଲିକା ପକ୍ଷୀ ଗଣନା ତଥ୍ୟ ଅନୁସାରେ ଏଠାକୁ ୨୦୦୨ରେ ସର୍ବାଧିକ ୧୫ ଲକ୍ଷ ୨୩ ହଜାର ୫୭୮ଟି ପକ୍ଷୀ ଆସିଥିବା ବେଳେ ୨୦୧୯ରେ ୧୮୧ ପ୍ରଜାତିର ୧୦ ଲକ୍ଷ ୪୭ ହଜାର ୯୬୮ଟି ପକ୍ଷୀ ଆସିଥିଲେ । ୨୦୨୦ରେ ଶୀତକାଳୀନ ପକ୍ଷୀ ଗଣନା ସମୟରେ ୧୧ ଲକ୍ଷ ୫୦୪୦ଟି ପକ୍ଷୀ ଆସିଥିବା ଜଣାପଡିଥିଲା । ୨୦୧୮ରେ ୧୪୭ଟି ପ୍ରଜାତିର ୮ ଲକ୍ଷ ୯୩ ହଜାର ୩୯୦ଟି ପକ୍ଷୀ ଆସିଥିଲେ । ୨୦୧୭ରେ ୧୬୧ଟି ପ୍ରଜାତିର ୯ ଲକ୍ଷ ୪୭ ହଜାର ୧୧୯ଟି ପକ୍ଷୀ ଆସିଥିବା ବନ୍ୟ ପ୍ରାଣୀ ବିଭାଗ ସୂତ୍ରରୁ ଜଣାପଡ଼ିଛି । ଚଳିତ ବର୍ଷ ପାଗ ଅନୁକୂଳ ଥିବାରୁ ପକ୍ଷୀଙ୍କ ସଂଖ୍ୟା  ଓ ପ୍ରଜାତି ବୃଦ୍ଧି ପାଇଥିବା ଏ.ସି.ଏଫ. ଶରତ ଚନ୍ଦ୍ର ମିଶ୍ର କହିଛନ୍ତି ।

ଏହା ବି ପଢ଼ନ୍ତୁ | Big Boss 14 ଘରେ ପ୍ରବେଶ କରିବେ ରାଖୀ ସାୱନ୍ତଙ୍କ ସ୍ୱାମୀ; ସଲମାନ ଖାଁଙ୍କୁ ପ୍ରଶଂସା କଲେ

‘‘କେରଳ, ରାଜସ୍ଥାନ ଓ ହିମାଚଳ ପ୍ରଦେଶ ଆଦି ରାଜ୍ୟଗୁଡ଼ିକରେ ଅନେକ ପକ୍ଷୀ ମୃତ୍ୟୁ ବରଣ କରୁଥିବା ବେଳେ ତାହା ବର୍ଡ଼ ଫ୍ଲୁ ବୋଲି ସନ୍ଦେହ କରାଯାଉଛି । ବର୍ତ୍ତମାନ ଚିଲିକାରେ ଲକ୍ଷ ଲକ୍ଷ ବିଦେଶାଗତ ପକ୍ଷୀଙ୍କ ସମାଗମ ହୋଇଥିବାରୁ ବର୍ଡ଼ ଫ୍ଲୁ ବ୍ୟାପିବା ସମ୍ଭାବନା ରହିଛି । ତେଣୁ ଡିସେମ୍ବର ୨୮ରେ ପକ୍ଷୀ ଅଭୟାରଣ୍ୟ ନଳବଣରୁ ପ୍ରାଣୀ ଚିକିତ୍ସା କେନ୍ଦ୍ର ବାଲୁଗାଁ ତରଫରୁ ବିଦେଶାଗତ ପକ୍ଷୀଙ୍କ ପର, ମଳ ଓ ସେମାନଙ୍କ ଚଳପ୍ରଚଳ ଅଞ୍ଚଳରୁ ଜଳ ଆଦି ସାତଟି ନମୁନା ସହ ସ୍ଥାନୀୟ ଅଞ୍ଚଳର ଚାରିଟି ଫାର୍ମରୁ କୁକୁଡ଼ା ଓ ବତକଙ୍କର ୫୨ଟି ସ୍ୱାବ ସଂଗ୍ରହ କରାଯାଇ ଫୁଲନଖରା ସ୍ଥିତ ପଶୁରୋଗ ଗବେଷଣା କେନ୍ଦ୍ରକୁ ପଠାଯାଇଛି  । ବର୍ତ୍ତମାନ ସୁଦ୍ଧା ରିପୋର୍ଟ ଆସି ନ ଥିବା ବେଳେ ବର୍ଡ଼ ଫ୍ଲୁର ଲକ୍ଷଣ ମିଳିଲେ ତାହା ଭୋପାଳ ପରୀକ୍ଷାଗାରକୁ ପଠାଯିବ,’’ କହିଛନ୍ତି ବାଲୁଗାଁ ପ୍ରାଣୀ ଚିକିତ୍ସାଧୀକାରୀ ଡଃ ଦେବାଶିଷ ଦାସ  ।



ଏ ବର୍ଷ ଚିଲିକାର ଅନୁକୁଳ ପରିବେଶ ଯୋଗୁଁ ପକ୍ଷୀଙ୍କ ସଂଖ୍ୟାରେ ରେକର୍ଡ ବୃଦ୍ଧି ଘଟିଥିବା ବେଳେ ବର୍ଡ଼ ଫ୍ଲୁ ସଂକ୍ରମଣ ଆଶଙ୍କା ସମସ୍ତଙ୍କୁ ଚିନ୍ତାରେ ପକାଇଛି । ପାଞ୍ଚଟି ରେଞ୍ଜ ଅଧିକାରୀଙ୍କୁ ବର୍ଡ଼ ଫ୍ଲୁ ସମ୍ପର୍କରେ ବିଭାଗ ପକ୍ଷରୁ ଚିଠି ପଠାଯାଇଛି । ଜାନୁଆରୀ ୬ରୁ ଚିଲିକାର ବିଭିନ୍ନ ସ୍ଥାନରୁ ପକ୍ଷୀଙ୍କ ସ୍ୱାବ ନମୁନା ସଂଗ୍ରହ ଜାରୀ ରହିଛି ।