ରାଜଧାନୀରେ ଷଣ୍ଢ ଆତଙ୍କ; ୪ ଆହତ, ଜଣେ ଗୁରୁତର

News18 Odia Digital

ଭୁବନେଶ୍ୱର: ରାଜଧାନୀରେ ଷଣ୍ଢ ଆତଙ୍କ। ଉପଦ୍ରବ କରିବା ସହ ଏକାଧିକ ଲୋକଙ୍କୁ କରିଛି ଆକ୍ରମଣ। ଷଣ୍ଢ ଆକ୍ରମଣରେ ୪ ଜଣ ହୋଇଛନ୍ତି ଆହତ ଓ ତନ୍ମଧ୍ୟରୁ ଜଣେ ଯୁବତୀ ଗୁରୁତର ଭାବେ ଏକ ଘରୋଇ ମେଡ଼ିକାଲରେ ଚିକିତ୍ସିତ ହେଉଛନ୍ତି।

ପାଗଳ ଷଣ୍ଢ ଉତ୍ପାତରେ ପଟିଆ ରେଳ ଷ୍ଟେସନ ଅଞ୍ଚଳରେ ଖେଳିଯାଇଛି ଆତଙ୍କ। ଦୁଇଦିନ ହେବ ସକାଳ ଓ ସନ୍ଧ୍ୟା ସମୟରେ ଷଣ୍ଢଟିର ଆକ୍ରମଣରେ ୪ ଜଣ ଗୁରୁତର ଆହତ ହୋଇଛନ୍ତି। ଗତକାଲି ସକାଳେ ଷଣ୍ଢର ଆକ୍ରମଣର ଶିକାର ହୋଇ ଦୁଇଜଣ ଆହତ ହୋଇଥିବା ବେଳେ ବର୍ତ୍ତମାନ ସୂଚନା ଅନୁସାରେ ପଟିଆ ଷ୍ଟେସନ ରାସ୍ତାରେ ପୁଣି ପାଗଳ ଷଣ୍ଢଟି ମାତିଛି । ବିଏମସିକୁ ଖବର ଦେବା ପରେ ମଧ୍ୟ କୌଣସି ପଦକ୍ଷେପ ନିଆଯାଇ ନଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା ଯାହା ଫଳରେ ଅନେକେ ହୋଇଛନ୍ତି ଷଣ୍ଢ ଆକ୍ରମଣର ଶିକାର।

ଏଥିପାଇଁ ଅଞ୍ଚଳବାସୀ ଠେଙ୍ଗା ବାଡ଼ି ଧରି ପାଗଳ ଷଣ୍ଢକୁ ଘଉଡାଇବା ସହିତ ଇଂଜଣା ଓ ପଟିଆ ଷ୍ଟେସନ ରାସ୍ତା ଦେଇ ଯାତାୟାତ କରୁଥିବା ସବୁ ଲୋକଙ୍କୁ ସତର୍କ କରୁଛନ୍ତି।