ସୌମ୍ୟରଞ୍ଜନଙ୍କ ସନ୍ଦେହଜନକ ମୃତ୍ୟୁ: ପତ୍ନୀ ବିଦ୍ୟାଭାରତୀଙ୍କ ହାତଲେଖା ଚିଠି ଠିଆକଲା ଅନେକ ପ୍ରଶ୍ନ

News18 Odia Digital

କଟକ: ପାରଳାଖେମୁଣ୍ଡି ଏ.ସି.ଏଫ୍‌. ସୌମ୍ୟରଞ୍ଜନ ମହାପାତ୍ରଙ୍କ ସନ୍ଦେହଜନକ ମୃତ୍ୟୁକୁ ନେଇ ସପ୍ତାହେ ଧରି ସାରା ରାଜ୍ୟରେ ଜାରି ରହିଥିବା ଚର୍ଚ୍ଚା ମଧ୍ୟରେ ତାଙ୍କ ପତ୍ନୀ ବିଦ୍ୟାଭାରତୀଙ୍କ ଏକ ହାତଲେଖା ଚିଠି ପୂରା ଘଟଣାକ୍ରମକୁ ଆଉ ଏକ ନୂଆ ମୋଡ଼ ଦେଇଛି । ସେହି ଚିଠିରେ ସେ ସୌମ୍ୟରଞ୍ଜନଙ୍କୁ ଘୃଣା କରନ୍ତି ଓ ୧୨ରୁ ୧୫ ତାରିଖ ମଧ୍ୟରେ ସମୟ କେମିତି କଟିଯାଉ ଇତ୍ୟାଦି କଥା ଲେଖିଛନ୍ତି । ଏହା ଏକ ନୂଆ ବିବାଦକୁ ଜନ୍ମ ଦେଇଛି ।

‘‘I hate you the most.. Plz God paradon (sic) me for all my mistakes… Please do not spoil my life plz.. କେମିତି ଆଉ 3ଟା ଦିନ କଟିବ.. ଆଟ ଲିଷ୍ଟ୍ 12-15.. ଶାନ୍ତିରେ ରହିବି,’’ ଲେଖିଛନ୍ତି ବିଦ୍ୟାଭାରତୀ । ‘‘I hate this man. Even hate combine my name with his..’’ ସେ ଆଉ ଏକ ସ୍ଥାନରେ ଲେଖିଛନ୍ତି । ‘‘ଛି..ଛି.. ଗୋଟିଏ ଡିସିସନ୍ କେମିତି ଲାଇଫ ସ୍ପଏଲ୍ କରି ଦିଏ । And I spiolled my life for all my stupid decesion. Plz ମୋତେ ମାଫ କରି ଦିଅ,’’ ସେ ଲେଖିଛନ୍ତି ଆଉ ସ୍ଥାନେ ।

ଏହା ବି ପଢ଼ନ୍ତୁ | ଅଲିମ୍ପିକ୍ସ: ଖେଳାଳିମାନଙ୍କ ପାଇଁ ଥିବା ବିଛଣାଗୁଡ଼ିକ anti-Sex ନୁହେଁ; Video ବନେଇ ଦେଖାଇଲେ ଖେଳାଳି

ସୌମ୍ୟରଞ୍ଜନଙ୍କ ପାରଳାଖେମୁଣ୍ଡି ସ୍ଥିତ ସରକାରୀ କ୍ବାଟରରୁ ଜବତ ହୋଇଥିବା ଏକ କଥିତ ଚୁକ୍ତିନାମା ପରେ ଏବେ ସେହି କୋଠରୀରୁ ଜବତ ହୋଇଥିବା ବିଦ୍ୟାଭାରତୀଙ୍କ ଏହି ହାତଲେଖା ଚିଠି ଏହି ବହୁଚର୍ଚ୍ଚିତ ଘଟଣାକୁ ଆହୁରି ବିବାଦୀୟ କରି ଦେଇଛି । ଏହି ଚିଠିଟି ବିଦ୍ୟାଭାରତୀ ନିଜେ ଲେଖିଥିବା କଥା ସ୍ବୀକାର କରିଛନ୍ତି ଏବଂ ସ୍ବାମୀଙ୍କ ସହ ମନୋମାଳିନ୍ୟ ପରେ ମନ ଦୁଖଃରେ ସେ ଏହି ଚିଠିଟି ଲେଖିଥିଲେ ବୋଲି କହିଛନ୍ତି । ସେହି ଚିଠିର ସୌମ୍ୟଙ୍କ ମୃତ୍ୟୁ ସହ କିଛି ସମ୍ପର୍କ ନ ଥିବା କଥା ମଧ୍ୟ ସେ କହିଛନ୍ତି ।

ଏହା ବି ପଢ଼ନ୍ତୁ | ମିତାଲି ରାଜ୍ ବିଶ୍ୱ ODI ରାଙ୍କିଙ୍ଗରେ ଟପ୍‌ରେ ଅଛନ୍ତି; ସ୍ମୃତି ମନ୍ଧାନା T20ରେ କରିଅର୍ ବେଷ୍ଟ୍‌ ତୃତୀୟ

‘‘ଥରେ ଗୋଟିଏ ଅଜଣା ନମ୍ବରରୁ ଗୋଟେ ଫୋନ୍‌ କଲ୍‌ ତାଙ୍କ ପାଖକୁ ଆସିଥିବାର ମୁଁ ଦେଖିଦେଲି । ମୁଁ ତାଙ୍କୁ କଲ୍ କରିବା ପାଇଁ ଆଉ ଥରେ କହିଲି । ତା’ ପରେ ସେ ନର୍ଭସ୍‌ ହୋଇଗଲେ । ସେହି ଚିଠିଟା ବି ସେହି ସମୟର । ନିଜ ମନର ଦୁଃଖ, ମନରେ ଭିତରେ ଆସିଥିବା ଯାହାବି କିଛି ଲେଖିଛି ସେଗୁଡ଼ାକର କିଛି ମୂଲ୍ୟ ନାହିଁ,’’ ଚିଠିଟି ସାର୍ବଜନୀନ ହେବା ପରେ ନିଜ ପ୍ରତିକ୍ରିୟାରେ ଗଣମାଧ୍ୟମକୁ କହିଛନ୍ତି ବିଦ୍ୟାଭାରତୀ ।

ଏହା ବି ପଢ଼ନ୍ତୁ | ୨ରୁ ୬ ବର୍ଷର ପିଲାଙ୍କ ପାଇଁ କରୋନା ଟିକା ପରୀକ୍ଷଣ ଚାଲିଛି; ଆସନ୍ତା ସପ୍ତାହରେ ଦ୍ୱିତୀୟ ଡୋଜ୍ ଦିଆଯିବ

ସେହି ଚିଠି ସେ କେବେ ଲେଖିଥିଲେ ତାହା ସେ ସ୍ପଷ୍ଟ କରି ନ ଥିଲେ ମଧ୍ୟ ସୌମ୍ୟରଞ୍ଜନଙ୍କ ସହ ମନୋମାଳିନ୍ୟ ହେବା ପରେ ପରେ ଏବଂ ତାଙ୍କ ମୃତ୍ୟୁ ଘଟିବାର କିଛି ଦିନ ପୂର୍ବରୁ ସେ ଏହି ଚିଠିଟି ଲେଖିଥିବା ଅନୁମାନ କରାଯାଉଛି । ସୌମ୍ୟରଞ୍ଜନଙ୍କ ମୃତ୍ୟୁ ଜୁଲାଇ ୧୩ ତାରିଖରେ ହୋଇଥିଲା । ଚିଠିରେ ବିଦ୍ୟାଭାରତୀ ଲେଖିଥିଲେ, ‘‘କେମିତି ଆଉ ୩ଟା ଦିନ କଟିବ.. ଆଟ୍‌ ଲିଷ୍ଟ୍ ୧୨-୧୫… ଶାନ୍ତିରେ ରହିବି’’ ।

ଏହା ବି ପଢ଼ନ୍ତୁ | ଶିଳ୍ପା ଶେଟ୍ଟୀଙ୍କ ସ୍ୱାମୀ ରାଜ୍ କୁନ୍ଦ୍ରାଙ୍କୁ ଗିରଫ କରାଗଲା; ଅଶ୍ଳୀଳ ଫିଲ୍ମ ବନାଉଥିବା ଅଭିଯୋଗ ଥିଲା

ହେଲେ ବିଦ୍ୟାଭାରତୀଙ୍କ ଏହି ଚିଠି ଏବେ ଅନେକ ଅସାହିତ ପ୍ରଶ୍ନଗୁଡ଼ିକୁ ଜନ୍ମ ଦେଇଛି । କ’ଣ ପାଇଁ ସୌମ୍ୟରଞ୍ଜନଙ୍କୁ ସେ ଏତେ ଘୃଣା କରୁଥିଲେ, ଚିଠିରେ ନିଜର ଯେଉଁ ସବୁ ମିସଟେକ୍ କଥା ସେ କହୁଛନ୍ତି ସେଗୁଡ଼ିକ ତାଙ୍କ ଜୀବନକୁ କେମିତି ନଷ୍ଟ କରିଦେଇଥିଲା, ଓ ଜୁଲାଇ ୧୨ ତାରିଖରୁ ୧୫ ତାରିଖ ମଧ୍ୟରେ କ’ଣ ସବୁ ଘଟିଥାନ୍ତା ଯେ ତାଙ୍କୁ ଶାନ୍ତି ମିଳିଥାନ୍ତା, ଏବଂ କାହାକୁ କ୍ଷମା କରି ଦିଅ ବୋଲି ସେ କହୁଛନ୍ତି ଆଦି ଅସ୍ପଷ୍ଟ ରହିଛି ।

ଏହା ବି ପଢ଼ନ୍ତୁ | ଟାଲିବାନ୍ ଆକ୍ରମଣରେ ପ୍ରାଣ ହରେଇଲେ ପୁରସ୍କାର-ପ୍ରାପ୍ତ ଭାରତୀୟ ଫଟୋ-ସାମ୍ବାଦିକ ଦାନିଶ ସିଦ୍ଦିକି

ଏହି ଚିଠିଟି ସାର୍ବଜନୀନ ହେବାର ଦୁଇ ଦିନ ପୂର୍ବରୁ ଜୁଲାଇ ୯ ତାରିଖ ଦିନ କରାଯାଇଥିବା ଏକ ଚୁକ୍ତି କଥା ବି ସାମନାକୁ ଆସିଥିଲା । ସେଥିରେ ସୌମ୍ୟରଞ୍ଜନ ନିଜର ସମସ୍ତ ଅର୍ଜିତ ସମ୍ପତ୍ତିକୁ ପତ୍ନୀଙ୍କ ନାମରେ କରିବା ଇଚ୍ଛା ପ୍ରକାଶ କରିଥିବା ଲେଖାଯାଇଛି । କିନ୍ତୁ ଏଥିରେ ପତିପତ୍ନୀଙ୍କ ଦସ୍ତଖତ ନ ଥିଲା । ଏହା ବ୍ୟତୀତ ସୌମ୍ୟରଞ୍ଜନ ବିଦ୍ୟାଭାରତୀଙ୍କୁ ଛାଡ଼ପତ୍ର ଦେବା ପାଇଁ ମଧ୍ୟ ଆଉ ଏକ ଏଗ୍ରିମେଣ୍ଟ ପ୍ରସ୍ତୁତ କରିଥିବା କୁହାଯାଉଛି ।

ଏହା ବି ପଢ଼ନ୍ତୁ | ୧୭ ବର୍ଷୀୟ ଯୁବକର ପାଟି ଭିତରେ ୮୨ଟି ଅଧିକ ଦାନ୍ତ! ଅପରେସନ୍ କରି ବାହାର କଲେ ଡାକ୍ତରମାନେ

ବିଦ୍ୟାଭାରତୀ ନିଜକୁ ଦୋଷମୁକ୍ତ ଥିବା କହୁଥିବା ବେଳେ ତାଙ୍କ ଶାଶୁ କିନ୍ତୁ ଏହାକୁ ଆଦୌ ଗ୍ରହଣ କରିବାକୁ ନାରାଜ । ଏପରିକି ଗତ କାଲି ବିଦ୍ୟାଭାରତୀ ଗଣମାଧ୍ୟମକୁ ସ୍ବାମୀ ସ୍ତ୍ରୀଙ୍କ ଫୋନ୍ ବାର୍ତ୍ତାଳାପର ପୂରା ଅଡି଼ଓକୁ ନ ଦେଇ କଥାବାର୍ତ୍ତାର ମାତ୍ର କିଛି ଅଂଶ କାହିଁକି ଦେଲେ ଓ ବାକି କଥାବାର୍ତ୍ତାରେ କ’ଣ ଥିଲା ବୋଲି ପ୍ରଶ୍ନ କରିଛନ୍ତି । ଯଦି ସୌମ୍ୟଙ୍କର କୌଣସି ଝିଅ ସହ ସମ୍ପର୍କ ଥିଲା ତେବେ ସେ କାହିଁକି ପୂର୍ବରୁ ସେ ବିଷୟରେ ନିଜ ଶାଶୁଶ୍ୱଶୁରଙ୍କୁ କହି ନ ଥିଲେ ବୋଲି ପାଲଟା ଅଭିଯୋଗ କରିଛନ୍ତି ସୌମ୍ୟରଞ୍ଜନଙ୍କ ମା’ ।

ଏହା ବି ପଢ଼ନ୍ତୁ ଓ ଦେଖନ୍ତୁ ଫଟୋ | ବିବାହର ମାତ୍ର ତିନି ମାସ ପରେ ମା’ ହେଲେ ବଲିଉଡ୍ ଅଭିନେତ୍ରୀ ଦିଆ ମିର୍ଜା; ପୁତ୍ର ଜନ୍ମ ଦେଲେ

‘‘ସେ ସବୁ ମିଛ କଥା । ସେ ତ ଆଗରୁ କହିପାରିଥାନ୍ତା ଯେ ଆଉ କେଉଁ ଝିଅ ସହିତ ତା’ର ସମ୍ପର୍କ ଅଛି ବୋଲି । ସେହି ଅଡିଓଟା ପୂରା ନ ଦେଇ ଅଧା କାହିଁକି ଦେଇଛି?’’ ପଚାରିଛନ୍ତି ସୌମ୍ୟରଞ୍ଜନଙ୍କ ମା' ତୁଳସୀ ମହାପାତ୍ର ।

ସୌମ୍ୟରଞ୍ଜନଙ୍କ ଅନ୍ୟ କୌଣସି ମହିଳାଙ୍କ ସହ କଥିତ ଫୋନ ବାର୍ତ୍ତାଳାପ, ଜୁଲାଇ ୯ ତାରିଖ ଉଲ୍ଲେଖ ଥିବା ଚୁକ୍ତିପତ୍ର, ଛାଡ଼ପତ୍ର ପର୍ଯ୍ୟନ୍ତ କଥା ଯିବା ଓ ଏହି ଏବେ ଚିଠି ସୌମ୍ୟରଞ୍ଜନଙ୍କ ମୃତ୍ୟୁ କେମିତି ହୋଇଥିଲା – ତାହା ଆତ୍ମହତ୍ୟା ନା ଏକ ଯୋଜନାବଦ୍ଧ ହତ୍ୟାକାଣ୍ଡ ଥିଲା – ତାକୁ ଜଟିଳ କରିଦେଇଛି । ପୋଲିସ ତଦନ୍ତ ପରେ ସତ୍ୟ ବାହାରକୁ ଆସିବ, ହେଲେ ସୌମ୍ୟରଞ୍ଜନଙ୍କ ମୃତ୍ୟୁ ପଛରେ ଏହି ସବୁ ପ୍ରସଙ୍ଗର ସିଧାସଳଖ ସମ୍ପୃକ୍ତି ରହିଛି ବୋଲି କହିଛନ୍ତି ଏହି ଘଟଣା ଉପରେ ନଜର ରଖୁଥିବା ଆଇନଜୀବୀମାନେ ।



ମୟୂରଭଞ୍ଜ ଜିଲ୍ଲାର କପ୍ତିପଦାରେ ବିଦ୍ୟାଭାରତୀଙ୍କ ପରିବାର ଓ ବାଲେଶ୍ୱର ଜିଲ୍ଲାର ଖଇରାରେ ସୌମ୍ୟରଞ୍ଜନଙ୍କ ପରିବାରର ବୟାନ ରେକର୍ଡ଼ କରିବା ପରେ ଫେରିଯାଇଛି ପାରଳାଖେମୁଣ୍ଡି ପୋଲିସ । ଡି.ଏଫ୍‌.ଓ. ସଂଗ୍ରାମ କେଶରୀ ବେହେରା ଓ ଗୁରାଣ୍ଡି ଥାନାଧିକାରୀ ତଥା ବିଦ୍ୟାଭାରତୀଙ୍କ ସମ୍ପର୍କୀୟ ଭାଉଜଙ୍କୁ ପାରଳାଖେମୁଣ୍ଡି ପୋଲିସ କ୍ରାଇମ୍‌ ବ୍ରାଞ୍ଚ୍‌ ଅଧିକାରୀଙ୍କ ସହ ମିଶି ଜେରା କରିବ ବୋଲି ଜଣାପଡ଼ିଛି ।