ଭଦ୍ରକ: ଜିଲ୍ଲାର ମେଡିକାଲ କଲେଜ ପ୍ରତିଷ୍ଠା ଦାବିରେ ଆଜି ୧୨ ଘଣ୍ଟିଆ ବନ୍ଦ ଡାକରା

News18 Odia Digital
ଭଦ୍ରକ: ଜିଲ୍ଲାରେ ଏକ ମେଡିକାଲ୍ କଲେଜ ପ୍ରତିଷ୍ଠା ନେଇ ବିଗତ ଅନେକ ବର୍ଷରୁ ଦାବି କରାଯାଉଛି । ଏଥପାଇଁ ସରକାରଙ୍କୁ ବହୁବାର ଦାବିପତ୍ର ମଧ୍ୟ ଦିଆଯାଇଛି । ମାତ୍ର ରାଜ୍ୟ ସରକାର ଭଦ୍ରକରେ ମେଡିକାଲ୍ କଲେଜ ପ୍ରତିଷ୍ଠା ନେଇ ମୌନ ରହିଥିବା ବେଳେ ଭଦ୍ରକବାସୀ ଏହାକୁ ଘୋର ବିରୋଧ କରୁଛନ୍ତି । ସେଥପାଇଁ ଜିଲ୍ଲା କଂଗ୍ରେସ କମିଟି ତରଫରୁ ଆଜି ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଭଦ୍ରକ ବନ୍ଦ କରାଯାଇଛି ।

ଅନେକ ସାମାଜିକ ସଂଗଠନଗୁଡ଼ିକ ରାଜ୍ୟ ସରକାରଙ୍କୁ ଏଥିନେଇ ତୀବ୍ର ସମାଲୋଚନା କରୁଛନ୍ତି । ଏଥପାଇଁ ସୋସିଆଲ ମିଡ଼ିଆରେ କଛିଦିନ ହେବ କିଛି ଭିଡିଓ ବାର୍ତ୍ତା ଦ୍ୱାରା ରାଜ୍ୟ ସରକାରଙ୍କ ପାଖରେ ଦାବି ମଧ୍ୟ କରୁଥିଲେ । କିନ୍ତୁ ସରକାରଙ୍କ ଏହାକୁ ନେଇ କୌଣସି ଦୃଢ଼ ଆଭିମୁଖ୍ୟ ଦେଖାଉନଥିବାରୁ ଆଜି ଜିଲ୍ଲା କଂଗ୍ରେସ କମିଟି ତରଫରୁ ଭଦ୍ରକ ବନ୍ଦ କରାଯାଇଛି। ସକାଳୁ ଭଦ୍ରକର ବନ୍ତ ଛକ, କଚେରି ବଜାର, ଚରମ୍ପା ଷ୍ଟେସନ ବଜାର, କଲେଜ ରୋଡ଼, ବାଇପାସ୍, ଭଦ୍ରକ ଚାନ୍ଦବାଲି ରୋଡ଼, ରାଣିତଲ୍ ଛକ, ଆରଡ଼ି ଛକ, ଶନି ମନ୍ଦିର ଛକ, ନୂଆ ବାସ ଷ୍ଟାଣ୍ଡ ଛକ ଓ ବାରିକପୁର ଆଦି ବିଭିନ୍ନ ଛକଠାରେ ମଧ୍ୟ ରାସ୍ତାକୁ ଅବରୋଧ କରାଯାଇଛି ।



ଏହା ସହ ୧୬ ନମ୍ବର ଜାତୀୟ ରାଜପଥକୁ ମଧ୍ୟ ବନ୍ଦ କରାଯାଇଛି । ଭଦ୍ରକର ବିଭିନ୍ନ ସରକାରୀ ଓ ବେସରକାରୀ ଅଫିସକୁ ବନ୍ଦ କରାଯାଇଛି । ରାଜରାସ୍ତା ବନ୍ଦ ରହିବାରୁ ହଜାର ହଜାର ଗଡ଼ି ରାସ୍ତା ଉପରେ ଅଟକି ରହିଛି । ଏହି ବନ୍ଦ ପାଇଁ ସ୍ଥାନୀୟ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି । ଆଜିର ଏଇ ବନ୍ଦ ବେଳେ ଜିଲ୍ଲା କଂଗ୍ରେସ ତଥା କଂଗ୍ରେସ ସଭାପତି ସୁବ୍ରତ ଦାସଙ୍କ ନେତୃତ୍ୱରେ ପାଳନ କରାଯାଉଛି ।

"ଭଦ୍ରକ ଜିଲ୍ଲା ଦୀର୍ଘ ଦୁଇ ଦଶନ୍ଧି ଧରି ମେଡିକାଲ କଲେଜ ପ୍ରତିଷ୍ଠା ପାଇଁ ଦାବି କରୁଛି । ଏହା ଆମର ନ୍ୟାର୍ଯ୍ୟ ଦାବି । ଜିଲ୍ଲାର ମୁଖ୍ୟ ଚିକିତ୍ସାଳୟର ସ୍ୱାସ୍ଥ୍ୟ ସୁବିଧା ଅତ୍ୟନ୍ତ ଶୋଚନୀୟ ରହିଛି । ସେଥିପାଇଁ ସମସ୍ତେ କଟକ ଏସିବି ମେଡିକାଲ ଉପରେ ନିର୍ଭର କରୁଛନ୍ତି । ଯାହା ଭଦ୍ରକ ମେଡିକାଲ ଠାରୁ 100 ରୁ ଅଧିକ କିଲୋମିଟର ଦୂରରେ ରହିଛି । ଯେଉଁଥିପାଇଁ ବାସୁଦେବପୁର, ଚାନ୍ଦବାଲି, ତିହିଡ଼ି, ଧାମରା ଆଦି ଦୂର ଅଞ୍ଚଳରୁ ଆସୁଥିବା ରୋଗୀଙ୍କ କଟକ ମେଡିକାଲ ପହଞ୍ଚିବା ପୂର୍ବରୁ ମୃତ୍ୟୁ ହେଉଛି । ଯଦି ସରକାର ଆମ ନ୍ୟାର୍ଯ୍ୟ ଦାବି ପୂରଣ ନ କରନ୍ତି ଆଗକୁ ଆନ୍ଦୋଳନ ତୀବ୍ର ରୂପ ନେବ, " କହିଛନ୍ତି ୩୨ ବର୍ଷୀୟ ଜିଲ୍ଲା ଯାଦବ ମହାସଂଘର ସଭାପତି ପ୍ରକାଶ ଜ୍ୟୋତି ମହାକୁଡ଼ ।