ଓଡ଼ିଶାରେ ବ୍ରାଉନ୍ ସୁଗାର୍ କାରବାରର ପେଣ୍ଠ ସ୍ଥଳୀ ପାଲଟିଛି ବାଲେଶ୍ବର ଜିଲ୍ଲା; ଅବକାରୀ ବିଭାଗ ଓ ପୋଲିସ୍ ଉଦାସୀନ
ଧଳା ଜହର ବାଂଲାଦେଶରୁ ଆସି ପଶ୍ଚିମବଙ୍ଗର ମେଦିନିପୁର ଓ ତା‘ପରେ ଲକ୍ଷ୍ମଣନାଥ ଗେଟ୍ ଦେଇ ବାଲେଶ୍ବର ସହରକୁ ଆସୁଛି
ଧଳା ଜହର ବାଂଲାଦେଶରୁ ଆସି ପଶ୍ଚିମବଙ୍ଗର ମେଦିନିପୁର ଓ ତା‘ପରେ ଲକ୍ଷ୍ମଣନାଥ ଗେଟ୍ ଦେଇ ବାଲେଶ୍ବର ସହରକୁ ଆସୁଛି
ବର୍ଷକ ମଧ୍ୟରେ ଦୁଇ କେଜିରୁ ଅଧିକ ବ୍ରାଉନ୍ ସୁଗାର ଜବତ ହେବା ସହିତ ଅନେକ ଚାଲାଣକାରୀ ଗିରଫ ହୋଇଥିଲେ ମଧ୍ୟ ମାଷ୍ଟର୍ମାଇଣ୍ଡକୁ ଏ ପର୍ଯ୍ୟନ୍ତ ଧରି ପାରୁନି ପୋଲିସ୍ କିମ୍ବା ଅବକାରୀ ବିଭାଗ । ସେପଟେ ଏହି କାରବାରରେ ବେପାରୀଙ୍କ ସହିତ ପୋଲିସ ଓ ଅବକାରୀ ବିଭାଗର କିଛି କର୍ମଚାରୀଙ୍କ ସଂପୃକ୍ତି ରହୁଥିବାର ଅଭିଯୋଗ ହୋଇଆସୁଛି ।
ବାଲେଶ୍ୱର ସହରର ବିଭିନ୍ନ ସ୍ଥାନରେ ଲୁଚି଼ ଲୁଚ଼ି ଅନେକ ଯୁବକ ଓ ପ୍ରୌଢ଼ ବ୍ରାଉନ୍ ସୁଗାର୍ ସେବନ କରୁଥିବାର ଦେଖିବାକୁ ମିଳୁଛି । ପ୍ରତ୍ୟେକ ଦିନ ଶହ ଶହ ଯୁବକ ଏଇ ଧଳା ଜହର କବଳରେ ଛନ୍ଦି ହୋଇଯାଉଛନ୍ତି । ଦିନକୁ ଦିନ ବ୍ରାଉନସୁଗାର ବ୍ୟବସାୟର କଳା କାରବାର ବଢ଼ିବାକୁ ଲାଗୁଥିବା ବେଳେ ଏହାକୁ ନିୟନ୍ତ୍ରଣ କରିବା ଏବେ ପୋଲିସ ଓ ଅବକାରୀ ବିଭାଗ ପାଇଁ ଏକ ବଡ଼ ଚ୍ୟାଲେଞ୍ଜ ହୋଇଛି ।
ପୋଲିସ୍ର ଅନୁସନ୍ଧାନରୁ ପ୍ରାପ୍ତ ସୂଚନା ଅନୁସାରେ ଏଇ ଧଳା ଜହର ପ୍ରକୃତରେ ଆସୁଛି ବାଂଲାଦେଶରୁ । ପ୍ରଥମେ ପଶ୍ଚିମବଙ୍ଗର ମେଦିନିପୁର ଜିଲ୍ଲାରେ ବ୍ରାଉନସୁଗାର ଆସି ପହଞଚ଼ୁଛି । ତାପରେ ଏହାକୁ ବ୍ୟବସାୟୀମାନେ ଲକ୍ଷ୍ମଣନାଥ ଗେଟ୍ ଦେଇ ବାଲେଶ୍ବର ସହରକୁ ଆଣୁଛନ୍ତି ।
ସୂତ୍ରଙ୍କ ଅନୁସାରେ ବାଲେଶ୍ବର ସହରର ଜଳେଶ୍ବର ଓ ଅରଡ଼ବଜାର ଅଞ୍ଚଳରୁ ସାରା ରାଜ୍ୟକୁ ଚା଼ଲାଣ ହେଉଛି ବ୍ରାଉନ୍ ସୁଗାର୍। ମୁଖ୍ୟତଃ ଖୋର୍ଦ୍ଧା, ପୁରୀ, କଟକ ଓ କେନ୍ଦ୍ରାପଡ଼ା ଆଦି ଅଞ୍ଚଳକୁ ହେଉଛି ଚାଲାଣ ବୋଲି କହିଛନ୍ତି ପାଲ କେନ୍ଦ୍ରାଞ୍ଚଳ ଅବକାରୀ ବିଭାଗ ନିରିକ୍ଷକ ଜଗଦିଶ ଚନ୍ଦ୍ର ।
ତେବେ ଗତ ବର୍ଷକର ରେକର୍ଡ଼ ଦେଖିଲେ ପୋଲିସ୍ ଓ ଗୋଇନ୍ଦା ବିଭାଗ ଦ୍ବାରା 3 କେଜିରୁ ଅଧିକ ବ୍ରାଉନ୍ ସୁଗାର୍ ଜବତ ହୋଇସାରିଛି । ପୋଲିସ୍ ଦ୍ୱାରା ପ୍ରାୟ 2 କେଜି ବ୍ରାଉନସୁଗାର ଜବତ ହୋଇଥିବାବେଳେ କଟକ ଅବକାରୀ ବିଭାଗ ମଧ୍ୟ ଏକ କେଜିରୁ ଉର୍ଦ୍ଧ୍ୱ ଧଳା ଜହର ଜବତ କରିଛି ।
ଯଦି ବାଲେଶ୍ୱର ଜିଲ୍ଲା ଅବକାରୀ ବିଭାଗର ରେକର୍ଡ଼ ଦେଖାଯାଏ ମାତ୍ର 300ରୁ 400 ଗ୍ରାମ ବ୍ରାଉନ୍ସୁଗାର୍ ଜବତ କରିବାରେ ସଫଳ ହୋଇପାରିଛି ବିଭାଗ । ତେବେ ଏ ନେଇ ଅବକାରୀ ବିଭାଗର ଅଜବ ଯୁକ୍ତି । ଷ୍ଟାଫ୍ ଅଭାବରୁ ସୂଚା ଥୀଲେ ମଧ୍ୟ ଅବକାରୀ ବିଭାଗ କାର୍ଯ୍ୟାନୁଷ୍ଠାନ କରି ପାରୁନାହିଁ ବୋଲି ସ୍ବୀକାର କରିଛନ୍ତି ଜିଲ୍ଲା ଅବକାରୀ ଏସ୍ପି ବିବେକାନନ୍ଦ ନାୟକ ।
ଗତ ମାସ 16 ତାରିଖରେ ଭୁବନେଶ୍ବରର ଏସ୍ଟିଏଫ୍ ଅରଡ଼ବଜାରର ଡ୍ରଗ୍ସ ମାଫିଆ ଏସ୍.କେ. ରାଜାକୁ ଧରିବା ପରେ ଏକ ବଡ଼ ରାକେଟ୍ର ଖୁଲାସା ହୋଇଥିଲା । ଘଟଣାରେ ରିମାଣ୍ଡ୍ରେ ନେଇ ରାଜାକୁ ଏସ୍ଟିଏଫ୍ ପଚରାଉଚୁରା କରିବାପରେ ରାଜା ସହିତ ପୋଲିସ୍ ଲିଙ୍କ୍ର ଗୁମର ମଧ୍ୟ ଖୋଲିଥିଲା । ବ୍ରାଉନ୍ ସୁଗାର୍ ବ୍ୟବସାୟୀଙ୍କୁ ପୋଲିସ୍ର ଗତିବିଧି ବିଷୟରେ ଖବର ଦେଉଥିବା ଅଭିଯୋଗରେ ଦୁଇ ଜଣ ପୋଲିସ୍କର୍ମୀଙ୍କୁ ଜିଲ୍ଲା ଏସ୍ପି ସସ୍ପେଣ୍ଡ୍ କରିବା ସହିତ ଜଣଙ୍କୁ ଗିରଫ ମଧ୍ୟ କରାଯାଇଥିଲା । ଏହା ପରେ ପୋଲିସ୍ ସହିତ ମାଫିଆ ଲିଙ୍କ୍ ସାମ୍ନାକୁ ଆସିଥିଲା ।
ବ୍ରାଉନ୍ ସୁଗାର୍ କାରବାର ସାରା ରାଜ୍ୟରେ ବଢ଼ୁଥିବାବେଳେ ଏହାର ପେଣ୍ଠ ସ୍ଥଳୀ ପାଲଟିଛି ବାଲେଶ୍ବର । ହେଲେ ପୋଲିସ୍ ଓ ଅବକାରୀ ବିଭାଗର ଆଖିଦୃଷିଆ କାର୍ଯ୍ୟାନୁଷ୍ଠାନ ନ ହେବା ଅବକାରୀ ବିଭାଗ ଓ ପୋଲିସ୍ର ଉଦାସୀନତା ବୋଲି ଲୋକେ ଅଭିଯୋଗ କରିଛନ୍ତି ।
କଟକରୁ ଅବକାରୀ ବିଭାଗ ବାଲେଶ୍ବର ଆସି ବ୍ରାଉନ୍ ସୁଗାର୍ ବେପାରୀଙ୍କୁ ଧରୁଥିବାବେଳେ ସ୍ଥାନୀୟ ଅବକାରୀ ଅଧିକାରୀ କାହାକୁ ଧରି ନପାରିବାକୁ ପ୍ରଶ୍ନ କରିଛନ୍ତି ବାଲେଶ୍ବରବାସୀ ରଞ୍ଜନ୍ ବାଗ୍ ।
