ଆଶ୍ଚର୍ଯ୍ୟ ! ୯ବର୍ଷ ପରେ ମନ୍ଦିରରୁ ଚୋରି ସାମଗ୍ରୀକୁ ଫେରାଇ ଦେଲା ଚୋର

News18 Odia Digital

ଓଡ଼ିଶା: ରାଜଧାନୀ ଉପକଣ୍ଠ ଧଉଳି ଥାନା ଗୋପିନାଥପୁର ଗାଁରେ ଏକ ଆଶ୍ଚର୍ଯ୍ୟକର ଘଟଣା ଦେଖିବାକୁ ମିଳିଛି । ୯ବର୍ଷ ପରେ ମନ୍ଦିରରୁ ଚୋରି ସାମଗ୍ରୀକୁ ଫେରାଇ ଦେଇଛି ଚୋର । ଠାକୁରଙ୍କ ଅଳଙ୍କାର ଫେରାଇବା ସହ ୧୦୧ଟଙ୍କା ଜୋରିମାନା ବି ଭରିଛି ଚୋର । ଅଧ ରାତିରେ ଏ ସବୁ ସାମଗ୍ରୀକୁ ଗାଁର ଏକ ତୁଳସୀ ଚଉଁରା ମୂଳେ ରଖି ଦେଇଥିଲା ଚୋର। ସବୁଠୁ ବଡ଼ କଥା ହେଉଛି, ଚୋର ନିଜର ଭୁଲ ବୁଝି ପାରିବା ସହ ଏକ ଚିଠି ମଧ୍ୟ ଛାଡି ଯାଇଛି ।

ଏଭଳି ଏକ ଆଶ୍ଚର୍ଯ୍ୟକର ଘଟଣା ଦେଖିବାକୁ ମିଳିଛି ରାଜଧାନୀ ଉପକଣ୍ଠ ଗୋପୀନାଥପୁର ଗାଁରେ। ଆଉ ଏ ହେଉଛି ସେହି ମନ୍ଦିର... ଆଉ ଫେରି ପାଇଥିବା ଚୋରି ସାମଗ୍ରୀ । ମନ୍ଦିର ଫାଟକରେ ଲାଗିଥିବା ଏହି ଚିଠି ଟି ଠାକୁରଙ୍କ ଉଦ୍ଦେଶ୍ୟରେ ଲେଖି ଛାଡ଼ି ଯାଇଛି ଚୋର। ଯେଉଁଥିରେ ଚୋର ଉଲ୍ଲେଖ କରିଛି, ଚୋରି କରିବା ପରେ ସେ କିଭଳି ଅସୁବିଧାର ସମ୍ମୁଖୀନ ହୋଇଛି । ଅନୁତାପ କରିବା ପରେ ରବିବାର ରାତିରେ ଏକ ପଲିଥିନ୍‌ରେ ଚୋରି କରିଥିବା ଠାକୁରଙ୍କ ସମସ୍ତ ଅଳଙ୍କାର ଫେରାଇଛି । ଏହାସହ ୧୦୧ଟଙ୍କା ଜରିମାନା ଓ ୨୦୧ ଟଙ୍କା ଦକ୍ଷିଣା ଦେଇ ଛାଡି ଯାଇଥିଲା ।

୨୦୧୪ରେ ଗୋପୀନାଥ ମନ୍ଦିରରୁ ଏକ ବଡ଼ ଧରଣର ଚୋରି ହୋଇଥିଲା । ଯେଉଁଥିରେ ଠାକୁରଙ୍କ ରୁପା ବଂଶୀ, ଛତା, ମୁକୁଟ, ରୁପା ଆଖି, ଥାଳି ଓ ଘଣ୍ଟକୁ ଚୋରି କରିଥିଲା ଚୋର । ସେତେବେଳେ ଗ୍ରାମବାସୀ ଏନେଇ ଲିଙ୍ଗରାଜ ଥାନାରେ ଅଭିଯୋଗ କରିଥିବା ବେଳେ ଗୁଣିଗାରେଡ଼ି ମଧ୍ୟ କରିଥିଲେ । ହେଲେ ଚୋରୀ ସାମଗ୍ରୀ ଫେରିନଥିଲା । ପରେ ଗ୍ରାମବାସୀ ଆଶା ଛାଡି ଦେଇଥିଲେ । ୯ ବର୍ଷ ପରେ ଠାକୁରଙ୍କ ଚୋରୀ ସାମଗ୍ରୀ ମିଳିବା ପରେ ଏବେ ଗାଁରେ ଉତ୍ସବର ମାହୋଲ ଦେଖିବାକୁ ମିଳିଛି ।

ପଢନ୍ତୁ ଏହି ଖବର: Cyclone Mocha: ବାତ୍ୟା ମୋକା ମାଡ଼ରେ ଛାରଖାର ମିଆଁମାର