ଭୁବନେଶ୍ୱରରେ ବ୍ୟବସାୟୀଙ୍କ ଠାରୁ ଦେଢ଼ ଲକ୍ଷ ଟଙ୍କା ଲୁଟି ଗିରଫ ହେଲେ ୬ ଜଣ ମିଛ ସାମ୍ବାଦିକ
ଏକ ୱେବ୍ ନ୍ୟୁଜ୍ ଚ୍ୟାନେଲର ସାମ୍ବାଦିକ ଭାବରେ ନିଜକୁ ପରିଚୟ ଦେଇ ଏହି ଛଅ ଜଣ ବ୍ୟକ୍ତି ଏକ ଘିଅ ଉତ୍ପାଦନ କରୁଥିବା କାରଖାନାର ମାଲିକଙ୍କୁ ଧମକ ଚମକ ଦେଇଥିଲେ ଓ ତାଙ୍କୁ ଠାରୁ ଦେଢ଼ ଲକ୍ଷରୁ ଅଧିକ ଟଙ୍କା ଲୁଟି ନେଇଥିଲେ ।
ଗିରଫ ହୋଇଥିବା ମିଛ ସାମ୍ବାଦିକଙ୍କ ଠାରୁ ଜବତ ହୋଇଥିବା ମୋବାଇଲ୍ ଫୋନ, ଟଙ୍କା ଓ ପରିଚୟ ପତ୍ର
- News18 Odia
- Last Updated: October 26, 2020, 8:52 PM IST
- Share this:
ଭୁବନେଶ୍ୱର: ରାଜ୍ୟ ରାଜଧାନୀରେ ଜଣେ ମଧ୍ୟ ଧରଣର ବ୍ୟବସାୟୀଙ୍କୁ ବ୍ଲାକମେଲ୍ କରି ତାଙ୍କ ଠାରୁ ଦେଢ଼ ଲକ୍ଷରୁ ଅଧିକ ଟଙ୍କା ବଟି ନେଇଥିବା ଅଭିଯୋଗରେ ପାଞ୍ଚ ଜଣ ତଥାକଥିତ ସାମ୍ବାଦିକଙ୍କ ସମେତ ଛଅ ଜଣଙ୍କୁ ଗିରଫ କରିଛି କମିଶନରେଟ ପୋଲିସ । ଭୁବନେଶ୍ୱର ଡିସିପି ଉମାଶଙ୍କର ଦାଶ କହିଛନ୍ତି ଯେ ଏହି ପାଞ୍ଚ ଜଣ ସାମ୍ବାଦିକ ପଞ୍ଜୀକୃତ ହୋଇ ନ ଥିବା ଏକ ୱେବ୍ ନ୍ୟୁଜ୍ ଚ୍ୟାନେଲରେ କାମ କରୁଛନ୍ତି ।
“ଗିରଫ ହୋଇଥିବା ଅଭିଯୁକ୍ତମାନେ ତମାଣ୍ଡୋରେ ଥିବା ଏକ ଘିଅ ଉତ୍ପାଦନ କରୁଥିବା ପ୍ଲାଣ୍ଟର ମାଲିକଙ୍କ ଠାରୁ ମୋ’ଟ ଏକ ଲକ୍ଷ ୬୪ ହଜର ଟଙ୍କା ଲୁଟି ନେଇଥିଲେ । ସେମାନଙ୍କ ଠାରୁ ୨୪ ହଜାର ଟଙ୍କା ଜବତ କରାଯାଇଛି। ସେମାନେ ଏହି ବ୍ୟବସାୟୀଙ୍କୁ ବ୍ଲାକମେଲିଂ କରୁଥିଲେ ଓ ତାଙ୍କ ବିରୋଧରେ ନେଗେଟିଭ୍ ନ୍ୟୁଜ୍ ସେମାନଙ୍କ ୱେବସାଇଟରେ ପ୍ରକାଶ କରିବେ ବୋଲି ଧମକ ଦେଉଥିବା ଅଭିଯୋଗ ହୋଇଥିଲା,’’ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଭୁବନେଶ୍ୱର ଡିସିପି ଉମାଶଙ୍କର ଦାଶ ।
ଏହି ତଥାକଥିତ ସାମ୍ବାଦିକମାନଙ୍କ ବିରୋଧରେ ହୋଇଥିବା ଅଭିଯୋଗର ତଦନ୍ତ କରିବା ପରେ ଖଣ୍ଡଗିରି ପୋଲିସ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଛି । ଡିସିପି ଉମାଶଙ୍କର ଦାସ କହିଛନ୍ତି ଯେ ଏହି ବଟି ଲୁଟ୍ ଘଟଣା ଅକ୍ଟୋବର ୨୪ ତାରିଖରେ ଘଟିଥିଲା । ସେ କହିଛନ୍ତି ଯେ ସାମ୍ବାଦିକ ବୋଲାଇ ଏମିତି ଅପପରାଧ କରୁଥିବା ଲୋକଙ୍କ ବିଷୟରେ ପୂର୍ବରୁ ଅନେକ ଅଭିଯୋଗ ପୋଲିସକୁ ମିଳିଛି ।
ଭୁବନେଶ୍ୱର ଡିସିପି ଉମାଶଙ୍କର ଦାଶ
ଏହା ବି ପଢ଼ନ୍ତୁ | ‘‘ଜା ସିମରନ୍ ଜା, ଜୀ ଲେ ଅପନୀ ଜିନ୍ଦେଗୀ…’’: ‘ଦିଲୱାଲେ ଦୁହ୍ଲନିଆ ଲେ ଜାଏଙ୍ଗେ’କୁ ୨୫ ପୂରିଲା; ଫିଲ୍ମର ଯାଦୁ ଏବେ ବି ସେମିତି ଅଛି!
‘‘ୱେବ୍ ନ୍ୟୁଜ୍ ଚ୍ୟାନେଲର ସାମ୍ବାଦିକ ଭାବରେ ନିଜକୁ ପରିଚୟ ଦେଇ ଏହି ଛଅ ଜଣ ବ୍ୟକ୍ତି ଏକ ଘିଅ ଉତ୍ପାଦନ କାରଖାନାର ମାଲିକଙ୍କୁ ଧମକ ଚମକ ଦେଉଥିଲେ ଓ ତାଙ୍କୁ ତିନି ଲକ୍ଷ ଟଙ୍କା ମାଗିଥିଲେ । ସେମାନେ କେତୋଟି ପର୍ଯ୍ୟାୟରେ ତାଙ୍କ ଠାରୁ ଦେଢ଼ ଲକ୍ଷରୁ ଅଧିକ ଟଙ୍କା ନେଇଥିଲେ । ପ୍ରଥମ କିସ୍ତିରେ ୯୯,୦୦୦ ଟଙ୍କା ଓ ପରେ ୩୧,୦୦୦ ଟଙ୍କା ନେଇଥିଲେ,’’ କହିଛନ୍ତି ଏହି ମାମଲାର ତଦନ୍ତ କରିଥିବା ଜଣେ ପୋଲିସ ଅଧିକାରୀ ।
ଡିସିପି ଉମାଶଙ୍କର ଦାଶ କହିଛନ୍ତି ଯେ ଗିରଫ ହୋଇଥିବା ଅଭିଯୁକ୍ତମାନଙ୍କ ଠାରୁ ଦୁଇଟି କାର୍, ଚାରିଟି ମୋଟର ସାଇକେଲ, ୩୧,୦୦୦ ଟଙ୍କା ଓ ଅନେକ ମୋବାଇଲ୍ ଫୋନ୍ ଜବତ କରାଯାଇଛି । ସେମାନଙ୍କୁ ଗିରଫ କରିବା ପରେ ସେମାନଙ୍କ କାର୍ଯ୍ୟାଳୟରେ ପୋଲିସ ପହଞ୍ଚି ତଦନ୍ତ ଚଳାଇଛି ।
ଏହା ବି ପଢ଼ନ୍ତୁ | ମହିଳାଙ୍କୁ ଦେଢ଼ ବର୍ଷ ପାଇଖାନାରେ ବନ୍ଦ୍ କରି ରଖିଥିଲେ ତାଙ୍କ ସ୍ୱାମୀ, ଉଦ୍ଧାର କରାଗଲା
ଗିରଫ ହୋଇଥିବା ବ୍ୟକ୍ତିମାନେ ହେଲେ ବିନାୟକ ବେହେରା (୩୦), ବିଶ୍ୱ ରଞ୍ଜନ ମହାନ୍ତି (୩୨), କାହ୍ନୁ ଚରଣ ନାୟକ (୨୮), ନରସିଂହ ବେହେରା (୩୦), ଲକ୍ଷ୍ମୀକାନ୍ତ ସାହୁ, ଓ ବଳରାମ ବେହେରା (୩୬)। ଏମାନଙ୍କ ବ୍ୟତୀତ ଏହି ଆପରାଧିକ ଗତିବିଧିରେ ଆଉ କିଏ କିଏ ଜଡ଼ିତ ଅଛନ୍ତି ତାହା ଜାଣିବାକୁ ପୋଲିସ ଚେଷ୍ଟା କରୁଛି ।
‘‘ଆମେ ଜନସାଧାରଣ ଓ ପ୍ରତିଷ୍ଠିତ ତଥା ପଞ୍ଜୀକୃତ ମିଡ଼ିଆ ସଙ୍ଗଠନମାନଙ୍କୁ ଅନୁରୋଧ କରୁଛୁ ଯେ ସେମାନେ ସାମ୍ବାଦିକତା ନାମରେ ହେଉଥିବା ଏହି ପ୍ରକାରର ଅପରାଧର ସୂଚନା ପାଇଲେ ପୋଲିସକୁ ଜଣାନ୍ତୁ । ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବ,’’ କହିଛନ୍ତି ଉମାଶଙ୍କର ଦାଶ ।
