ଜଳେଶ୍ବରରୁ ପୁଣି ଜବତ ହେଲା ୪.୨୫ କିଲୋ ବ୍ରାଉନ ସୁଗାର; ୨ ଗିରଫ; ବିଦେଶୀ ଲିଙ୍କର ତଦନ୍ତ ଚାଲିଛି

୪ କେଜିରୁ ଅଧିକ ବ୍ରାଉନ ସୁଗାର ଜବତ ହେବା ଚଳିତ ବର୍ଷର ଦ୍ବିତୀୟ ଘଟଣା । ରାଜ୍ୟରେ ଗତ ୮ ବର୍ଷ ମଧ୍ୟରେ ଜବତ ହୋଇଥିବା ବ୍ରାଉନ ସୁଗାରର ପରିମାଣକୁ ବଳିଗଲା ୨୦୨୦ ମସିହାର ୮ ମାସରେ ଜବତ ହୋଇଥିବା ବ୍ରାଉନ ସୁଗାର ।

ଜଳେଶ୍ବରରୁ ପୁଣି ଜବତ ହେଲା ୪.୨୫ କିଲୋ ବ୍ରାଉନ ସୁଗାର; ୨ ଗିରଫ; ବିଦେଶୀ ଲିଙ୍କର ତଦନ୍ତ ଚାଲିଛି
(ପ୍ରତୀକାତ୍ମକ ଛବି)
  • News18 Odia
  • Last Updated: August 28, 2020, 12:28 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

କଟକ: ରାଜ୍ୟର ବ୍ରାଉନ ସୁଗାର ଚୋରା ଚାଲାଣର ପେଣ୍ଠସ୍ଥଳ ପାଲଟିଥିବା ଜଳେଶ୍ଵରରୁ ପୁଣି ୪ କେଜି ୨୫ ଗ୍ରାମ ଓଜନ ବାଉନ ଜବତ ହୋଇଛି । ଜଳେଶ୍ବର ଥାନା ଅନ୍ତର୍ଗତ ଏକ ନିର୍ଦ୍ଦିଷ୍ଟ ସ୍ଥାନରେ ଚଢ଼ାଉ କରି ଏସ.ଟି.ଏଫ. ଏହି ବ୍ରାଉନ ସୁଗାରକୁ ଜବତ କରିଥିବା ବେଳେ ଏହି କାରବାର କିରିବା ଅଭିଯୋଗରେ ଦୁଇ ଜଣଙ୍କୁ ଗରିଫ କରିଛି । ୪ କେଜିରୁ ଅଧିକ ବ୍ରାଉନ ସୁଗାର ଜବତ ହେବା ଚଳିତ ବର୍ଷର ଦ୍ବିତୀୟ ଘଟଣା ।

ବଡ଼ କଥା ହେଲା ଯେ ଚଳିତ ବର୍ଷ ଏ ପର୍ଯ୍ୟନ୍ତ କ୍ରାଇମ ବ୍ରାଞ୍ଚର ଏସ.ଟି.ଏଫ. ରାଜ୍ୟରେ ବ୍ରାଉନ ସୁଗାର କାରବାର ନେଇ ମୋଟ ୨୨ଟି ମାମାଲା ରୁଜୁ କରିଛି । ଏହି ୨୨ଟି ମାମାଲାରେ ଜବତ ହୋଇଥିବା ବ୍ରାଉନ ସୁଗାର ମୋଟ ଓଜନ ହେଉଛି ୨୦ କେଜି ୭୩୬ ଗ୍ରାମ । ଏହା ଗତ ୮ ବର୍ଷରେ ଓଡ଼ିଶା ପୋଲିସ ଜବତ କରିଥିବା ମୋଟ ବ୍ରାଉନ ସୁଗାର ପରିମାଣ ଠାରୁ ଅଧିକ । ଅର୍ଥାତ ଗତ ୮ ବର୍ଷରେ ରାଜ୍ୟରେ ଯେତିକି ବ୍ରାଉନ ସୁଗାର ଜବତ ହୋଇ ନ ଥିଲା ତାହା ଠାରୁ ଅଧିକ ପରିମାଣର ବ୍ରାଉନ ସୁଗାର ଏହି ବର୍ଷର ୮ ମାସ ମଧ୍ୟରେ ଜବତ ହୋଇ ସାରିଲାଣି । ଏହି ୮ ମାସ ମଧ୍ୟରେ ଏହି ନିଶା କାରବାର କରିବା ଅଭିଯୋଗରେ ଗିରଫ ହୋଇଥିବା ଲୋକଙ୍କ ସଂଖ୍ୟା ୪୩ ରେ ପହଞ୍ଚିଛି । କ୍ରାଇମ ବ୍ରାଞ୍ଚ ମୁଖ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏହାର ସୂଚନା ଦେଇଛନ୍ତି ପୋଲିସ ଡିଜି ଅଭୟ ।

‘‘ଏହି ବ୍ରାଉନ ସୁଗାର ଜବତ ଘଟଣାର ତଦନ୍ତ ପ୍ରାଥମିକ ପର୍ଯ୍ୟାୟରେ ରହିଛି । ଏହାର ଅନ୍ୟ ଲିଙ୍କ୍ ମଧ୍ୟ ଖୋଜା ଚାଲିଛି । ରାଜ୍ୟରେ ନିଶା କାରବାର ରୋକିବା ଉପରେ ଆମେ ବିଶେଷ ଧ୍ୟାନ ଦେଉଛୁ । ଏହା ଫଳରେ ବ୍ରାଉନ ସୁଗାର ଜବତ କରିବାରେ ପୋଲିସକୁ ସଫଳତା ମିଳୁଛି । ଓଡ଼ିଶାକୁ ଆସୁଥିବା ବ୍ରାଉନ ସୁଗାର ମୁଖ୍ୟତଃ ପଶ୍ଚିମ ବଙ୍ଗ ଦେଇ ଜଳେଶ୍ବରକୁ ଆସୁଛି । କିନ୍ତୁ ଏହା କେଉଁଠି ତିଆରି ହେଉଛି ଏବଂ ପଶ୍ଚିମ ବଙ୍ଗକୁ କେମିତି ଆସୁଛି ତାହା ଆମେ ଏ ପର୍ଯ୍ୟନ୍ତ ଜାଣି ପାରିନାହୁଁ,’’ କହିଛନ୍ତି ପୋଲିସ ଡିଜି ଅଭୟ।

ଡିଜିପି ଅଭୟ (ବାମ) ସାମ୍ବାଦିକ ସମ୍ମିଳନୀରେ ସୂଚନା ଦେଉଛନ୍ତି ।


ଓଡ଼ିଶାରେ ହେଉଥିବା ବ୍ରାଉନ ସୁଗାର କାରବାରରେ ପାକିସ୍ତାନ ଲିଙ୍କ ଓ ଏଥିରେ ମାଫିଆ ଡନ ଦାଉଦ ଇବ୍ରାହିମର ହାତ ରହିଛି କି ବୋଲି ଏକ ପ୍ରଶ୍ନର ଉତ୍ତର ମଧ୍ୟ ରଖିଥିଲେ ଡିଜିପି । ‘‘ଏହି ଲିଙ୍କ ଆମ ତଦନ୍ତରୁ ଏ ପର୍ଯ୍ୟନ୍ତ ସାମନାକୁ ଆସିନାହିଁ । ହେଲେ ଏହି କାରବାରରେ ବିଦେଶୀ ଲିଙ୍କ ଥିବା ନେଇ ଆମେ ତଦନ୍ତ କରୁଛୁ । ଓଡ଼ିଶାରୁ ଗଞ୍ଜେଇ ଓ ବ୍ରାଉନ ସୁଗାର କାରବାରକୁ ରୋକିବା ପାଇଁ ୯୯ ପ୍ରତିଶତ ପୋଲିସ କର୍ମଚାରୀ ପ୍ରତିବଦ୍ଧ ଅଛନ୍ତି । ବହୁତ କମ ସଂଖ୍ୟକ ପୋଲିସ କର୍ମଚାରୀ ଏହି କାରବାର ସହିତ ଜଡ଼ିତ ଥାଇପାରନ୍ତି । ଯଦି ସେମିତି କେହି ବାହାରୁଛନ୍ତି ତେବେ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠନ କରୁଛୁ,’’ ସେ କହିଛନ୍ତି ।

୭୦ ଦଶକରେ କଟକକୁ ଲାଗି କରିଥିବା ଯାଜପୁର ଜିଲ୍ଳାର ଛତିଆ ବ୍ରାଉନ ସୁଗାର କାରବାର ଅନ୍ୟତମ ପେଣ୍ଠସ୍ଥଳ ଥିଲା । ପ୍ରାୟ ଚାରି ଦଶନ୍ଧି ଧରି ଛତିଆ ଅଞ୍ଚଳ ଏହି କାରବାର ପାଇଁ ସମଗ୍ର ରାଜ୍ୟରେ କୁଖ୍ୟାତି ଅର୍ଜନ କରିଥିଲା । କିନ୍ତୁ ସେତେ ବେଳେ ଛତିଆରେ ଚାଲିଥିବା ବ୍ରାଉନ ସୁଗାର କାରବାରକୁ ସମୁଳେ ଧ୍ୱଂସ କରିବା ପାଇଁ ପୋଲିସ ସ୍ବତନ୍ତ୍ର ଆକ୍ସନ ପ୍ଲାନ ପ୍ରସ୍ତୁତ କରିଥିଲା । ଫଳ ସ୍ବରୂପ ୯୦ ଦଶକରେ ପାଖାପାଖି ତିନି ବର୍ଷ ଧରି ଚାଲିଥିବା ପୋଲିସର ଏହି ଅଭିଯାନ ପରେ ଛତିଆରୁ ଏହି କାରବାର ସମ୍ପୂର୍ଣ୍ଣ ବନ୍ଦ ହୋଇଥିଲା ।

ଏହା ବି ପଢ଼ନ୍ତୁ | ଅନଲାଇନ୍ ଠକେଇ ପାଇଁ ଅନ୍ତର୍ଜାତୀୟ ଗ୍ୟାଙ୍ଗ୍ ଏହି ମହିଳାଙ୍କ ଠାରୁ ଭଡ଼ାରେ ନେଉଥିଲେ ଆକାଉଣ୍ଟ୍

ଏହା ବି ପଢ଼ନ୍ତୁ ଆସନ୍ତା ବର୍ଷ ଭାରତରେ ମିଳିବ ଏହି କମାଲ୍ ଇଲେକ୍ଟ୍ରିକ୍ କାର୍, ପୂରା ଚାର୍ଜରେ ୪୦୦ କିମି ଚାଲିବ

‘‘ଆମେ ପୂର୍ବରୁ ବ୍ରାଉନ ସୁଗାର କାରବାରର ଖୋଳତାଡ଼ କରୁ ନଥିଲୁ । କିଛି ମାସ ହେଲା ଆମେ ଏହି କାରବାରକୁ ରୋକିବା ପାଇଁ ଉଦ୍ୟମ ଆରମ୍ଭ କରିଛୁ । ସେଥିରେ ସଫଳ ମଧ୍ୟ ହେଉଛୁ । ଛତିଆ ତ ଗୋଟିଏ ଛୋଟ ଜାଗା ଥିଲା । ଛତିଆକୁ ବ୍ରାଉନ ସୁଗାର ମୁକ୍ତ କରିବା ପାଇଁ ଆମକୁ ୩ ବର୍ଷ ସମୟ ଲାଗିଥିଲା । ହେଲେ ଜଳେଶ୍ବର ଏକ ବଡ଼ ଅଞ୍ଚଳ । ପଶ୍ଚିମ ବଙ୍ଗକୁ ଲାଗି କରି ରହିଛି । ଜଳେଶ୍ବରରୁ ହିଁ ଓଡ଼ିଶାର ଅନ୍ୟ ଅଞ୍ଚଳକୁ ବ୍ରାଉନ ସୁଗାର ଚାଲାଣ ହେଉଛି । ଆମେ ନିଜ ଯୋଜନା ଅନୁସାରେ କାମ କରୁଛୁ । ଦିନେ ଦୁଇ ଦିନ ଭିତରେ ବ୍ରାଉନ ସୁଗାର କାରବାର ଆଉ ଗୋଟିଏ ରାକେଟର ପର୍ଦ୍ଦାଫାଶ କରିବୁ,’’ କହିଛନ୍ତି କ୍ରାଇମ ବ୍ରାଞ୍ଚର ଜଣେ ବରିଷ୍ଠ ଅଧିକାରୀ ।



ଅବକାରୀ ଗୁଇନ୍ଦା ବିଭାଗ ପକ୍ଷରୁ ମିଳିଥିବା ସୂଚନା ମୁତାବକ ଜଳେଶ୍ବର ଅଞ୍ଚଳରେ ଗତ କିଛି ବର୍ଷ ହେଲା ଜୋରଦାର ରେଡ ପରେ ଏବେ ଏହି ବ୍ୟବସାୟର ଶାଖା ପ୍ରଶାଖା ରାଜ୍ୟର ବିଭିନ୍ନ ସ୍ଥାନକୁ ମେଲି ସାରିଛି । ଭଦ୍ରକର କିଛି ଅଞ୍ଚଳ ସହିତ କଟକର ଗ୍ରାମାଞ୍ଚଳ ଓ କେନ୍ଦ୍ରାପଡା ଜିଲ୍ଲାକୁ ମଧ୍ୟ ଏହା ବ୍ୟାପି ସାରିଛି । ପର୍ଯ୍ୟଟନ କ୍ଷେତ୍ର ହୋଇଥିବାରୁ ପୁରୀରେ ଦୀର୍ଘ ଦିନ ଧରି ଏହି ବ୍ୟବସାୟ ଜାରି ରହିଥିବା ବେଳେ ଏବେ ମଧ୍ୟ ସେଠାକାର କିଛି କିଛି ଅଞ୍ଚଳରେ ବେଧଡ଼କ ଭାବେ ଏହି କାରବାର ଚାଲିଛି ।
Published by: Anand Shankar Thankur Das
First published: August 28, 2020, 12:28 PM IST
corona virus btn
corona virus btn
Loading