ଆମେରିକା ଆୟୋଗ ରିପୋର୍ଟରେ ବଡ଼ ଖୁଲାସା - ଚୀନ୍ ସରକାର କରିଥିଲେ ଗାଲୱାନ୍ ଘଟଣାର ଯୋଜନା

News18 Odia Digital
ୱାଶିଂଟନ୍: ଆମେରିକାର ଏକ ଗୁରୁତ୍ୱପୂର୍ଣ୍ଣ କମିଶନ ଏହାର ରିପୋର୍ଟରେ ଭାରତ ଓ ଚୀନ୍ ମଧ୍ୟରେ LAC ଉପରେ ଗାଲୱାନ୍ (Galwan) ଘଟଣା ବିଷୟରେ ଏକ ବଡ଼ ଖୁଲାସା କରିଛନ୍ତି । ରିପୋର୍ଟରେ କୁହାଯାଇଛି ଯେ କିଛି ତଥ୍ୟ ଅନୁଯାୟୀ ଚୀନ୍ ସରକାର ଗାଲୱାନ୍ ଘଟଣାର ଯୋଜନା କରିଥିଲେ । ଯେଉଁଥିରେ ସୈନିକ ମାନଙ୍କ ଜୀବନ ହରାଇବାର ସମ୍ଭାବନା ରହିଥିଲା । ଆମେରିକା-ଚୀନ୍ ଅର୍ଥନୈତିକ ସୁରକ୍ଷା ସମୀକ୍ଷା ଆୟୋଗର ରିପୋର୍ଟରେ ଏହା ପ୍ରକାଶ ପାଇଛି ଓ ଆମେରିକା ସଂସଦ ପାଇଁ ଏହି ରିପୋର୍ଟ ପ୍ରସ୍ତୁତ କରାଯାଇଛି ।

ଆୟୋଗର ରିପୋର୍ଟରେ କୁହାଯାଇଛି ଯେ ଘଟଣାର କିଛି ସପ୍ତାହ ପୂର୍ବରୁ ଚୀନ୍ ପ୍ରତିରକ୍ଷା ମନ୍ତ୍ରୀ ସାମରିକ ବଳର ବ୍ୟବହାର ବିଷୟରେ କହିଥିଲେ । ଯାହା ପରେ ଭାରତ-ଚୀନ୍ ସୀମାରେ ହିଂସାତ୍ମକ ସଂଘର୍ଷ ଘଟିଥିଲା । ଯେଉଁଥିରେ ୧୯୭୫ ମସିହା ପରେ ପ୍ରଥମ ଥର ପାଇଁ ପ୍ରାଣହାନି ଘଟିଥିଲା । ଏହା ବ୍ୟତୀତ ଗାଲୱାନ୍ ହିଂସା ପୂର୍ବରୁ ସେଟଲାଇଟ ଫଟୋଗୁଡ଼ିକରେ ଗାଲୱାନ୍ ଉପତ୍ୟକାରେ ଚୀନ୍ ତରଫରୁ ୧୦୦୦ ଚୀନ୍ ସୈନିକଙ୍କ ଉପସ୍ଥିତିରେ ବ୍ୟାପକ ଭିତ୍ତିଭୂମି ନିର୍ମାଣ କରୁଥିବା ଦେଖାଯାଇଥିଲା ।

ଆମେରିକା ଆୟୋଗର ରିପୋର୍ଟ ଅନୁଯାୟୀ ଚୀନ୍ ବହୁ ବର୍ଷ ଧରି ପଡୋଶୀ ଦେଶ ବିରୁଦ୍ଧରେ ଅଭିଯାନକୁ ତୀବ୍ର କରି ଜାପାନ ଓ ଭାରତ ସମେତ ଦକ୍ଷିଣ ପୂର୍ବ ଏସିଆର ଦେଶଗୁଡ଼ିକୁ ସାମରିକ ବିବାଦ ପାଇଁ ଉତ୍ସାହିତ କରିଥିଲା । ରିପୋର୍ଟ ଅନୁଯାୟୀ ଚୀନ୍‌ର ଲକ୍ଷ୍ୟ ହେଉଛି ଭାରତକୁ ଏହାର ସୀମା ମଧ୍ୟରେ ଭିତ୍ତିଭୂମି ନିର୍ମାଣରୁ ନିବୃତ୍ତ କରିବା କିମ୍ବା ଭାରତକୁ ଆମେରିକା ପ୍ରତି ପ୍ରବୃତ୍ତି ବିଷୟରେ ଚେତାବନୀ ଦେବା । ତେବେ ଚୀନ୍‌ର ନିଷ୍ପତ୍ତି ପ୍ରଭାବହୀନ ଥିଲା ।

ଆମେରିକା-ଚୀନ୍ ଅର୍ଥନୈତିକ ଓ ସୁରକ୍ଷା ସମୀକ୍ଷା ଆୟୋଗ କ’ଣ?
ଏହି ଆୟୋଗକୁ ଅନୌପଚାରିକ ଭାବରେ ଆମେରିକା-ଚୀନ୍ ଆୟୋଗ ମଧ୍ୟ କୁହାଯାଏ । ଏହା ହେଉଛି ଆମେରିକା ସରକାରଙ୍କ ସଂସଦୀୟ ଆୟୋଗ । ଅକ୍ଟୋବର ୨୦୦୦ ମସିହାରେ ଏହା ଗଠନ କରାଯାଇଥିଲା ଓ ଆୟୋଗର କାର୍ଯ୍ୟ ହେଉଛି ଆମେରିକା ଓ ଚୀନ୍ ମଧ୍ୟରେ ଜାତୀୟ ସୁରକ୍ଷା ଓ ବାଣିଜ୍ୟ ପ୍ରସଙ୍ଗ ଉପରେ ନଜର ରଖିବା ।