SCO ସମ୍ମିଳନୀରେ ପିଏମ ମୋଦି ଓ ଜିନପିଙ୍ଗ କରିବେ ସାକ୍ଷାତ; ଭାରତ..ଚୀନ୍ ସମ୍ପର୍କ ଉପରେ ହେବ ଆଲୋଚନା !

News 18 Odia Digital

ଦିଲ୍ଲୀ : ଆସନ୍ତା ସପ୍ତାହରେ ଉଜବେକିସ୍ତାନରେ ଅନୁଷ୍ଠିତ ହେବାକୁ ଥିବା ଏସସିଓ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଂଶଗ୍ରହଣ କରିବେ । ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ସମ୍ପର୍କରେ ସୂଚନା ଦେଇ ଵୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ ଏହି ସମ୍ମିଳନୀରେ ଅଂଶଗ୍ରହଣ କରିବା ବ୍ୟତୀତ ପ୍ରଧାନମନ୍ତ୍ରୀ ମୋଦି ମଧ୍ୟ ଦ୍ୱିପାକ୍ଷିକ ଵୈଠକ କରିବେ । ଏଭଳି ପରିସ୍ଥିତିରେ ଏବେ ଭାରତୀୟ ପ୍ରଧାନମନ୍ତ୍ରୀ ମୋଦି ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସମ୍ଭାବ୍ୟ ଵୈଠକ ଉପରେ ସମସ୍ତଙ୍କ ନଜର ରହିଛି ।

ଯଦି ଦୁଇ ନେତାଙ୍କ ମଧ୍ୟରେ ପାରସ୍ପରିକ ଵୈଠକ ଏବଂ ଦ୍ୱିପାକ୍ଷିକ କଥାବାର୍ତ୍ତା ହୁଏ, ତେବେ LAC ବିବାଦ ପରେ ଏହା ପ୍ରଥମ ଥର ହେବ ଯାହା ଉଭୟ ନେତା ମୁହାଁମୁହିଁ କଥାବାର୍ତ୍ତା ହେବେ । ମୋଦି ଏବଂ ସି ଜିନପିଙ୍ଗଙ୍କ ମଧ୍ୟରେ ସମ୍ଭାବ୍ୟ ଆଲୋଚନା ମଧ୍ୟ ଭାରତ-ଚୀନ୍ ସମ୍ପର୍କର ତିକ୍ତତାକୁ ହ୍ରାସ କରିବାରେ ସହାୟକ ହେବ ।

ଏସସିଓ ସମ୍ମିଳନୀରେ ଏମାନେ ମଧ୍ୟ ହେବେ ସାମିଲ

ଏହି ସମ୍ମିଳନୀରେ ନରେନ୍ଦ୍ର ମୋଦିଙ୍କ ବ୍ୟତୀତ ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ, ଚୀନ୍ ରାଷ୍ଟ୍ରପତି ସି ଜିନପିଙ୍ଗ, ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫ ମଧ୍ୟ ଅଂଶଗ୍ରହଣ କରିବେ । ଉଜବେକିସ୍ତାନର ରାଷ୍ଟ୍ରପତି ଶବକତ୍ ମିର୍ଜିୟୋୟେଭଙ୍କ ନିମନ୍ତ୍ରଣରେ ପ୍ରଧାନମନ୍ତ୍ରୀ ମୋଦି ସମରକାଣ୍ଡରେ ଅନୁଷ୍ଠିତ ହେବାକୁ ଥିବା ସଂଘାଇ ସହଯୋଗ ସଂଗଠନ ଵୈଠକରେ ଅଂଶଗ୍ରହଣ କରିବେ । ୧୫-୧୬ ସେପ୍ଟେମ୍ବରରେ SCO ସମ୍ମିଳନୀ ଅନୁଷ୍ଠିତ ହେବ ।

ଏହି ବିଷୟଗୁଡ଼ିକ ଉପରେ ହେବ ଆଲୋଚନା

ଏସସିଓ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଂଶଗ୍ରହଣ ବିଷୟରେ ଘୋଷଣା କରି ଵୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ ଗତ ଦୁଇ ଦଶନ୍ଧି ମଧ୍ୟରେ ଏସସିଓର କାର୍ଯ୍ୟର ସମୀକ୍ଷା କରିବା ସହିତ ଭବିଷ୍ୟତରେ ବହୁଦେଶୀୟ ସହଯୋଗ ମଧ୍ୟ ଆଲୋଚନା ହେବ । ଵୈଠକରେ ଆଞ୍ଚଳିକ ତଥା ଆନ୍ତର୍ଜାତୀୟ ସ୍ତରର ପ୍ରସଙ୍ଗ ଉପରେ ମଧ୍ୟ ଆଲୋଚନା କରାଯିବ ।