India-China Rift: ଭାରତୀୟ ସେନା ଫେରାଇଲା ଲଦ୍ଦାଖ ସୀମାରେ କଏଦ ହୋଇଥିବା ଯବାନ; ଚୀନ୍ ସେନା କହିଲା ଧନ୍ୟବାଦ

News18 Odia Digital
ବେଜିଂ/ନୂଆ ଦିଲ୍ଲୀ: ଭାରତ-ଚୀନ୍ ସୀମାରେ (India-China Standoff) ମାସ ମାସ ଧରି ଚାଲିଥିବା ତିକ୍ତତା ମଧ୍ୟରେ ଭାରତୀୟ ସେନା (Indian Army) ମଙ୍ଗଳବାର ଦିନ ଚୀନର (China) ଅନୁରୋଧକୁ ରକ୍ଷା କରିଛି ଓ ସୀମା ନିକଟରେ ଧରା ଯାଇଥିବା ଚୀନ୍ ସୈନିକଙ୍କୁ ସୁରକ୍ଷିତ ଭାବେ ଫେରାଇ ଦେଇଛି । ଚୀନ୍‌ର ପିପୁଲ୍ସ ଲିବରେସନ୍ ଆର୍ମି (PLA) ଏକ ବିବୃତ୍ତି ଜାରି କରି ଚୀନର ଯବାନ ଫେରାଇବାକୁ ଭାରତୀୟ ସେନାକୁ ଅନୁରୋଧ କରିଥିଲା । ଚୀନ୍ ସେନା କହିଛି ଯେ ଏହି ଯବାନ ମେଷପାଳକ ରାସ୍ତାକୁ ଅନୁସରଣକରି ବିପଥଗାମୀ ହୋଇ LAC ଅତିକ୍ରମ କରିଥିଲା ।

ସୋମବାର ଦିନ ଭାରତୀୟ ସେନା କହିଥିଲା ଯେ ସେ ପିପୁଲ୍ସ ଲିବରେସନ୍ ଆର୍ମିର ଜଣେ ସୈନିକଙ୍କୁ ପୂର୍ବ ଲଦ୍ଦାଖର ଡେମୋକୋକ ସେକ୍ଟରରେ ସେତେବଳେ କଏଦ କରିଥିଲା ଯେତେବେଳେ LAC ରେ ବିପଥଗାମୀ ହୋଇ ବୁଲୁଥିବା ଦେଖିବାକୁ ମିଳିଥିଲା । ଗ୍ଲୋବାଲ ଟାଇମ୍ସ ଅନୁଯାୟୀ ଏହି ସୈନିକଙ୍କୁ ବୁଧବାର ସକାଳେ ଫେରାଇ ଦିଆଯାଇଛି । ଏହି ସକରାତ୍ମକ ଆଚରଣ ପାଇଁ ଚୀନ୍ ସେନା ଭାରତୀୟ ସେନାକୁ ଧନ୍ୟବାଦ ଜଣାଇଛି ଓ ମାସ ମାସ ଧରି ଚାଲିଆସୁଥିବା ଉତ୍ତେଜନା ମଧ୍ୟରେ ଏହାକୁ ଏକ ଭଲ ସଙ୍କେତ ବୋଲି ବିବେଚନା କରିଛି । ଗାଲଭାନ ଉପତ୍ୟକାରେ ହିଂସାତ୍ମକ ସଂଘର୍ଷ ପରଠାରୁ ଉଭୟ ଦେଶରେ ଉତ୍ତେଜନା ରହିଆସିଛି । ଚୀନ୍ ଓ ଭାରତ ମଧ୍ୟରେ କମାଣ୍ଡର ସ୍ତରରେ ଆଠ ଥରରୁ ଅଧିକ ଆଲୋଚନା ହୋଇ ସାରିଛି ।

ଚୀନ୍ ସେନା କରିଥିଲା ଅନୁରୋଧ
ଭାରତୀୟ ସେନା ଏକ ବିବୃତ୍ତି ଜାରି କରି କହିଛି ଯେ ଗିରଫ ହୋଇଥିବା ସୈନିକ ଚାଇନାର ପିପୁଲ୍ସ ଲିବରେସନ୍ ଆର୍ମିର (PLA) କର୍ପୋରେଟର ୱାଙ୍ଗ କିମ୍ବା ଲଙ୍ଗ ବୋଲି ଜଣା ପଡିଛି । ଔପଚାରିକତା ସମାପ୍ତ କରିବା ପରେ ତାଙ୍କୁ ଚୁସୁଲ-ମୋଲଡୋ ସୀମାନ୍ତରେ ଚୀନ୍ ସେନାକୁ ହସ୍ତାନ୍ତର କରାଯାଇଥିଲା । ପିଏଲଏର ୱେଷ୍ଟର୍ଣ୍ଣ ଥିଏଟର କମାଣ୍ଡର ମୁଖପାତ୍ର ସିନିୟର କର୍ଣ୍ଣେଲ ଝାଙ୍ଗ ଶୁଇଲି ଦାବି କରିଛନ୍ତି ଯେ ଚୀନ୍ ସୈନିକ ୧୮ ଅକ୍ଟୋବର ସନ୍ଧ୍ୟାରେ ସିନୋ-ଇଣ୍ଡିଆ ସୀମାରେ ନିଖୋଜ ହୋଇଯାଇଥିଲେ ଯେତେବେଳେ ସେ ସ୍ଥାନୀୟ ଲୋକଙ୍କୁ ତାଙ୍କ ୟାକ ଖୋଜିବାରେ ସାହାଯ୍ୟ କରୁଥିଲେ ।

ଏହି ଘଟଣାର ପରେ ତୁରନ୍ତ PLA ସୀମାରେ ଅବସ୍ଥାପିତ ସୈନ୍ୟମାନେ ଭାରତୀୟ ସେନାକୁ ସୂଚନା ଦେଇଥିଲେ ଓ ଆଶା କରିଥିଲେ ଯେ ଏହାର ସନ୍ଧାନ ତଥା ଉଦ୍ଧାର କାର୍ଯ୍ୟରେ ଭାରତୀୟ ଦଳ ସାହାଯ୍ୟ କରିବ । ଭାରତୀୟ ଦଳ ନିଖୋଜ ସୈନିକଙ୍କୁ ଖୋଜିବା ଓ ସାହାଯ୍ୟ କରି ଫେରସ୍ତ କରିବାକୁ ପ୍ରତିଶୃତି ଦେଇଥିଲେ । କର୍ଣ୍ଣେଲ ଝାଙ୍ଗ କହିଛନ୍ତି ଯେ ଭାରତୀୟ ପକ୍ଷରୁ ମିଳିଥିବା ସର୍ବଶେଷ ସୂଚନା ଅନୁଯାୟୀ ନିଖୋଜ ଚୀନ୍ ସୈନିକ ମିଳିଛି ଓ ଡାକ୍ତରୀ ପରୀକ୍ଷା ପରେ ତାଙ୍କୁ ଚୀନ୍ ହସ୍ତାନ୍ତର କରାଯାଇଛି ।

ଏହି ସୈନିକ ପୂର୍ବ ଲଦ୍ଦାଖର ଡେମୋକୋକ ସେକ୍ଟରରେ ବୁଲୁଥିଲେ । ନ୍ୟୁଜ୍ ଏଜେନ୍ସି ANI ରିପୋର୍ଟ କରିଛି ଯେ ଗିରଫ ହେବା ପରେ ଭାରତୀୟ ସେନା ମାନବିକତା ଉଦାହରଣ ପ୍ରଦାନ କରି ଏହି ଚୀନ୍ ସୈନିକଙ୍କୁ ଅତ୍ୟଧିକ ଉଚ୍ଚତା ଓ କଠିନ ଜଳବାୟୁ ପରିସ୍ଥିତିରୁ ରକ୍ଷା କରିବା ପାଇଁ ଅମ୍ଳଜାନ, ଖାଦ୍ୟ ଓ ଉଷ୍ମ ଚିକିତ୍ସା ସାମଗ୍ରୀ ଯୋଗାଇ ଦେଇଥିଲେ । ANI ଅନୁଯାୟୀ ଭାରତୀୟ ସେନା ନିଜ ବିବୃତ୍ତିରେ କହିଥିଲା ଯେ ପ୍ରୋଟୋକଲ ଅନୁଯାୟୀ ନିର୍ଦ୍ଧାରିତ ପ୍ରକ୍ରିୟା ପାଳନ କରିବା ପରେ ଚୁସୁଲ-ମୋଲଡୋ ମିଟିଂ ପଏଣ୍ଟରେ ଚୀନ୍ ସୈନିକଙ୍କୁ ଚୀନ୍ ସେନାକୁ ହସ୍ତାନ୍ତର କରାଯିବ ।