ଲକଡାଉନ୍ ଭାଙ୍ଗିଦେଇଛି କ୍ଷୁଦ୍ର ଶିଳ୍ପ ସଂସ୍ଥାଙ୍କ ମେରୁଦଣ୍ଡ; ସେମାନେ ସରକାରୀ ସାହାଯ୍ୟକୁ ଅନେଇଛନ୍ତି
ସରକାର ଖୁବ୍ ଶୀଘ୍ର ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥାମାନଙ୍କ ପାଇଁ ବଡ଼ ଆର୍ଥିକ ପ୍ୟାକେଜ ଘୋଷଣା ନ କଲେ ରାଜ୍ୟର ୪ ଲକ୍ଷରୁ ଅଧିକ କ୍ଷୁଦ୍ର ଶିଳ୍ପଦ୍ୟୋଗୀ ଓ ସେମାନଙ୍କ ୧୫ ଲକ୍ଷ କର୍ମଚାରୀଙ୍କ ସ୍ଥିତି ଆହୁରି ଖରାପ ହେବ ।
(ପ୍ରତୀକାତ୍ମକ ଛବି)
ଭୁବନେଶ୍ୱର: ଲକଡାଉନ୍ ଅବଧି ବଢ଼ିବା ଯୋଗୁଁ ରାଜ୍ୟର ବିପର୍ଯ୍ୟସ୍ତ ହୋଇପଡ଼ିଥିବା ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥାଗୁଡ଼ିକର ସ୍ଥିତି ଆହୁରି ଖରାପ ହୋଇପାରେ । ରାଜ୍ୟରେ ପାଖାପାଖି ୪ ଲକ୍ଷ ଶିଳ୍ପଦ୍ୟୋଗୀ ପଞ୍ଜିକୃତ ଓ ସେମାନଙ୍କ ପ୍ରତିଷ୍ଠାନରେ ପାଖାପାଖି ୧୫ ଲକ୍ଷ କର୍ମଚାରୀ କାର୍ଯ୍ୟ କରନ୍ତି । ଏକ ଆକଳନ ଅନୁସାରେ ଏହି କର୍ମଚାରୀମାନଙ୍କ ଭିତରୁ ଏକ ତୃତୀୟାଂଶ ଚାକିରୀ ହରାଇ ପାରନ୍ତି ।
ମଞ୍ଚେଶ୍ୱର ଅଞ୍ଚଳର ଶିଳ୍ପଦ୍ୟୋଗୀ ବଂଶୀଧର ବାରିକଙ୍କ ମୋର କାଠ ସାମଗ୍ରୀର ଫାକ୍ଟ୍ରି ଲକଡାଉନ କାରଣରୁ ଦେଢ଼ ମାସରୁ ଅଧିକ ସମୟ ହେଲା ବନ୍ଦ ପଡ଼ିଛି । ‘‘ଶୋ ରୁମରେ ତାଲା ଝୁଲୁଛି । ଫାକ୍ଟ୍ରିରେ କୁକୁର ବୁଲୁଛନ୍ତି । ଯନ୍ତ୍ରପାତି ଖତ ଖାଇଲାଣି । ନିଜ ବ୍ୟବସାୟର ଭବିଷ୍ୟତକୁ ନେଇ ମୁଁ ଅନେକ ଅନିଶ୍ଚିତତା ଭିତରେ ଅଛି । ଦେଢ଼ ମାସେ ହେଲା ବିନା ଆୟରେ କର୍ମଚାରୀଙ୍କୁ ଦରମା ଦେଇ ଆସୁଛି । ହେଲେ ଆଗକୁ ଦେବା ସମ୍ଭବ ନୁହେଁ । ସରକାର ଯଦି କିଛି ଉଚ୍ଚ ପଦକ୍ଷେପ ନ ନିଅନ୍ତି ତେବେ ଫାକ୍ଟ୍ରି ବନ୍ଦ କରିବାକୁ ବାଧ୍ୟ ହେବି,’’ ସେ କହିଛନ୍ତି ।
ଅନୁରୂପ ସ୍ଥିତି ଯୁବ ବ୍ୟବସାୟୀ ଦିଲ୍ଲୀପ ମହାରଣାଙ୍କର । ନିଜର ଡିଜିଟାଲ ଷ୍ଟୁଡିଓ ବ୍ୟବସାୟକୁ ନେଇ ସେ ଏବେ ଖୁବ ହତାଶ। ‘‘ମୋ’ ଷ୍ଟୁଡ଼ିଓରେ ୧୦ ଜଣ କର୍ମଚାରୀ ଅଛନ୍ତି । ଦୁଇ ମାସ ହେଲା କିଛି ବ୍ୟବସାୟ ନାହିଁ । ତେଣୁ ଆଗକୁ କର୍ମଚାରୀଙ୍କୁ କେମିତି ଦେବି ଦରମା? କିଛି ସରକାରୀ ପ୍ରୋତ୍ସାହନ ନ ମିଳିଲେ ବାଧ୍ୟ ହେବି ବ୍ୟବସାୟ ବନ୍ଦ କରିବାକୁ,’’ କହିଛନ୍ତି ମହାରଣା ।
‘‘ଏ ଭଳି ସଙ୍କଟ ସମୟରେ ଶିଳ୍ପଦ୍ୟୋଗୀଙ୍କ ଲାଗି ଅଧିକ ସରକାରୀ ପ୍ରୋତ୍ସାହନ ଦରକାର । ଅଧିକ ସରକାରୀ ପ୍ରୋତ୍ସାହନ ନ ମିଳିଲେ ଅଧିକାଂଶ ଅଣୁ, କ୍ଷୁଦ୍ର ଓ ମାଧ୍ୟମ ଶିଳ୍ପ ସଂସ୍ଥା ବନ୍ଦ ହୋଇଯିବ,’’ କହିଛନ୍ତି ଉତ୍କଳ ଚ୍ୟାମ୍ବର ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରିଜ (ୟୁସିସିଆଇ) ସଭାପତି ରମେଶ ଚନ୍ଦ୍ର ମହାପାତ୍ର ।
ମିଳିଥିବା ସୂଚନା ଅନୁସାରେ ଖୁବ ନିକଟରେ କେନ୍ଦ୍ର ସରକାର ଦେଶର ଅଣୁ, କ୍ଷୁଦ୍ର ଓ ମାଧ୍ୟମ ଶିଳ୍ପ ସଂସ୍ଥାମାନଙ୍କ ପାଇଁ ପାୟ ୩ ଲକ୍ଷ କୋଟି ଟଙ୍କାର ପ୍ୟାକେଜ ଘୋଷଣା କରିପାରନ୍ତି । ତେଣୁ ଏହି ଘୋଷଣା ଉପରେ ନିର୍ଭର କରୁଛି ରାଜ୍ୟର ୪ ଲକ୍ଷରୁ ଅଧିକ କ୍ଷୁଦ୍ର ଶିଳ୍ପଦ୍ୟୋଗୀ ଓ ସେମାନଙ୍କ ୧୫ ଲକ୍ଷ କର୍ମଚାରୀଙ୍କ ଭାଗ୍ୟ ।
