ପୁରୀରେ ସଙ୍ଗରୋଧ ନିୟମ ଭାଙ୍ଗି ବାହାରେ ବୁଲି ଫଟୋ ଉଠେଇଲେ ପ୍ରବାସୀ, ଏବେ ମଜା ଚାଖୁଛନ୍ତି

ତେଲେଙ୍ଗାନାରୁ ପୁରୀ ଫେରିବା ପରେ ପ୍ରବାସୀ ଓଡ଼ିଆ ଯୁବକ ସଙ୍ଗରୋଧରେ ରହିବେ ଓ ଘରୁ ବାହାରିବେ ନାହିଁ ବୋଲି ଅଣ୍ଡରଟେକିଂ ଲେଖି ଦେଇଥିଲେ । ହେଲେ ସେ ସହରରେ ବୁଲାବୁଲି କରି ଫେସବୁକରେ ଫଟୋ ଅପଲୋଡ଼ କରିବା ପରେ ଧରାପଡ଼ିଛନ୍ତି ।

ପୁରୀରେ ସଙ୍ଗରୋଧ ନିୟମ ଭାଙ୍ଗି ବାହାରେ ବୁଲି ଫଟୋ ଉଠେଇଲେ ପ୍ରବାସୀ, ଏବେ ମଜା ଚାଖୁଛନ୍ତି
ସମୁଦ୍ର କୂଳରେ ଓ ଶ୍ରୀମନ୍ଦିର ସାମନାରେ ନିର୍ବେନ୍ଦୁ ଉଠେଇଥିବା ଫଟୋ ।
  • News18 Odia
  • Last Updated: July 14, 2020, 10:06 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ପୁରୀ: ରାଜ୍ୟରେ ବଢ଼ୁଥିବା କରୋନା ସଂକ୍ରମଣ ପଛରେ ଥିବା ପ୍ରବାସୀଙ୍କ କାରଣକୁ ନେଇ ସରକାରଙ୍କର ଚିନ୍ତିତ, ହେଲେ କିଛି ଅମାନିଆ ପ୍ରବାସୀ ଜାଣିଶୁଣି ଏହି ଚିନ୍ତାକୁ ଆହୁରି ବଢ଼ାଉଛନ୍ତି । ତେଲେଙ୍ଗାନାରୁ ପୁରୀ ଫେରିଥିବା ଜଣେ ପ୍ରବାସୀ ଓଡ଼ିଆ ଯୁବକ ସଙ୍ଗରୋଧରେ ରହି ଘରୁ ବାହାରିବେ ନାହିଁ ବୋଲି ଅଣ୍ଡରଟେକିଂ ଲେଖି ଦେବା ପରେ ବି ସହରରେ ବୁଲାବୁଲି କରି ଫେସବୁକରେ ଫଟୋ ଅପଲୋଡ଼ କରିବା ପରେ ଧରାପଡ଼ିଛନ୍ତି । ତାଙ୍କ ବିରୋଧରେ ମାମଲା ରୁଜୁ ହୋଇ ଆଇନଗତ କାର୍ଯ୍ୟାନୁଷ୍ଠାନ ନିଆଯାଉଛି ।

୩୫ ବର୍ଷୀୟ ପ୍ରବାସୀ ଓଡ଼ିଆ ଯୁବକ ନିର୍ବେନ୍ଦୁ କୁମାର ପଟ୍ଟନାୟକ ଜୁଲାଇ ୫ ତାରିଖ ଦିନ ତେଲେଙ୍ଗାନାରୁ ପୁରୀ ଫେରିଥିଲେ । ପୌର ସଂସ୍ଥା କଲ୍ୟାଣ ମଣ୍ଡପରେ ନିଜର ପଞ୍ଜୀକରଣ କରିବା ସହ ସେଥିରେ ୨୨ ନମ୍ବର ୱାର୍ଡ଼ର କୁମ୍ଭାରପଡ଼ା ଘରେ ସଙ୍ଗରୋଧରେ ରହିବେ ଓ ଘରୁ ବାହାରିବେ ନାହିଁ ବୋଲି ଅଣ୍ଡରଟେକିଂ ଲେଖି ଦେବା ପରେ ତାଙ୍କୁ ଅନୁମତି ଦିଆଯାଇଥିଲା ।

ନିର୍ବେନ୍ଦୁଙ୍କ ଘରେ ସଙ୍ଗରୋଧର ଷ୍ଟିକର ମାରିବାକୁ ଯାଇଥିବା ସରକାରୀ କର୍ମଚାରୀମାନେ ଜାଣିବାକୁ ପାଇଥିଲେ ଯେ ସେ ଘରେ ନାହାନ୍ତି । ତାଙ୍କୁ ତୁରନ୍ତ ଫୋନ କରି ଯୋଗାଯୋଗ କରାଯାଇଥିଲା ଓ କୋବିଡ ନିୟମ ଅନୁସାରେ ଘରେ ଆଇସୋଲେସନରେ ରହିବା ପାଇଁ ତାଗିଦ କରାଯାଇଥିଲା । ସେ ଘରେ ରହିବେ ବୋଲି ଫୋନରେ ସମ୍ମତି ବି ପ୍ରଦାନ କରିଥିଲେ ।

ପୁରୀରେ ଘରକୁ ଘର ବୁଲି ପ୍ରାଶାସନିକ ଅଧିକାରୀ ତଦନ୍ତ କରୁଛନ୍ତି ।


‘‘ଏହି ସୂଚନା ଆମେ ଅତିରିକ୍ତ ସ୍ୱାସ୍ଥ୍ୟ ଅଧିକାରୀ ଓ ତହସିଲଦାରଙ୍କୁ ମଧ୍ୟ ଦେଇଥିଲୁ । ଗୋଟେ ଅଭିଯୋଗ ଆସିଲା ଯେ କୁମ୍ଭାରପଡ଼ାର ପ୍ରବାସୀ ଓଡ଼ିଆ ଯୁବକ ନିର୍ବେନ୍ଦୁ ଲଗାତାର ଘରୁ ବାହାରି ବୁଲାବୁଲି କରୁଛନ୍ତି  । ସେ ନେଇ ଆମେ ତାଙ୍କ ଉପରେ ନଜର ରଖିବା ପରେ ଜଣା ପଡିଲା ଯେ ଜୁଲାଇ ୧୧ ତାରିଖ ସେ ଶ୍ରୀମନ୍ଦିର ସମ୍ମୁଖକୁ ଯାଇ ସେଲଫି ନେବା ସହ ସେହି ଫଟୋ ନିଜ ଫେସବୁକ ପେଜରେ ଅପଲୋଡ କରିଛନ୍ତି । ପୁଣି ତା’ ପର ଦିନ ଅର୍ଥାତ ଜୁଲାଇ ୧୨ରେ ନିଜର ନାଲି ରଙ୍ଗର (ନମ୍ବର OD 13 N 3517)ରେ ସମୁଦ୍ର କୂଳ ଯାଇ ସେଠି ସେଲଫି ନେବା ସହ ପୁରୀ ସହର ଓ ଶ୍ରୀମନ୍ଦିର ପାଖରେ ପୁଣି ବୁଲାବୁଲି କରିବାର ଫଟୋ ଅପଲୋଡ କରିଛନ୍ତି । ଏସବୁ କୋବିଡ ନିୟମର ଖୋଲାଖୋଲି ଉଲଙ୍ଘନ,’’ କହିଛନ୍ତି କୋବିଡ ପାଇଁ ୨୨ ନମ୍ବର ୱାର୍ଡର ନୋଡାଲ ଅଫିସର ଭାବେ ନିଯୁକ୍ତ ରବି ନାରାୟଣ ମହାପାତ୍ର ।

ମହାପାତ୍ର ଓ ପୌରପାଳିକାର ଅତିରିକ୍ତ ନିର୍ବାହୀ ଅଧିକାରୀ ସରୋଜ ସ୍ୱାଇଁ ନିର୍ବେନ୍ଦୁଙ୍କ ଘରକୁ ଯାଇ ତଦନ୍ତ କରିବା ପରେ ସେ କୋଭିଡ୍‌ ନିୟମ ବାରମ୍ବାର ଭାଙ୍ଗିଥିବା ସ୍ପଷ୍ଟ ହୋଇଥିଲା । ଉପଜିଲ୍ଲାପାଳଙ୍କୁ ଏ ନେଇ ଅବଗତ କରାଯାଇଥିଲା ବୋଲି କହିଛନ୍ତି ପୁରୀ ତହସିଲଦାର ଆଶିଷ ସାହୁ  ।

‘‘ନିର୍ବେନ୍ଦୁଙ୍କ ନାରେ ଦୁଇ ଦୁଇ ଥର ଏଭଳି ଅଭିଯୋଗ ଆସିବା ପରେ ତାଙ୍କୁ ଘରୁ ଆମ୍ବୁଲାନ୍ସରେ ଉଠାଇ ଆଣି ଏବେ ହୋଟେଲ ରୁମାନୀରେ ପେଡ କ୍ୱାରାଣ୍ଟାଇନରେ ରଖାଯାଇଛି । କୋବିଡ ନିୟମ ଉଲଙ୍ଘନ କରିବା ଅଭିଯୋଗରେ ପ୍ରଶାସନ ତରଫରୁ ତାଙ୍କ ବିରୁଦ୍ଧରେ ଡିଜାଷ୍ଟର୍‌ ମ୍ୟାନେଜମେଣ୍ଟ ଆକ୍ଟ (Disaster Management Act, 2005)ର ଦଫା ୫୧ ଓ IPCର ଦଫା ୧୮୮ ଅନୁଯାୟୀ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ କରିବା ପାଇଁ ପଦକ୍ଷେପ ନିଆଯାଉଛି,’’ କହିଛନ୍ତି ଉପଜିଲ୍ଲାପାଳ ଭବତାରଣ ସାହୁ ।

ଏହା ବି ପଢ଼ନ୍ତୁ: ପତି ଓ ପତ୍ନୀଙ୍କ ସହ ତାଙ୍କର ୧୨ ଓ ୮ ବର୍ଷର ପୁଅ ଝିଅ ବି ଦଉଡ଼ି ଲଗେଇ ଆତ୍ମହତ୍ୟା କଲେ

ଏହା ବି ପଢ଼ନ୍ତୁ: ପଶ୍ଚିମ ବଙ୍ଗରେ ବିଜେପି MLAଙ୍କ ଝୁଲନ୍ତା ଶବ ଏକ ଦୋକାନ ସାମନାରେ ମିଳିଲା; ହତ୍ୟା ଅଭିଯୋଗ ଆସୁଛି

ରାଜ୍ୟ ସରକାର ପ୍ରବାସୀମାନଙ୍କୁ ରହିବା ଓ ଖାଇବା ପିଇବା ପାଇଁ କ୍ୱାରାଣ୍ଟାଇନର ସବୁ ସୁବିଧା କରିଥିବା ସତ୍ତ୍ୱେ ନିର୍ବେନ୍ଦୁଙ୍କ ଭଳି କିଛି ଅମାନିଆ ପ୍ରବାସୀ ଅନ୍ୟମାନଙ୍କ ପାଇଁ ଅସୁରକ୍ଷାର ପରିବେଶ ସୃଷ୍ଟି କରୁଛନ୍ତି । ସେମାନଙ୍କୁ ନିୟନ୍ତ୍ରଣ କରିବାକୁ କଠୋର ପଦକ୍ଷେପ ନେବା ପାଇଁ ଦାବି ହେଉଛି ।
Published by: Anand Shankar Thankur Das
First published: July 14, 2020, 10:06 PM IST
corona virus btn
corona virus btn
Loading