ଲକଡାଉନରେ ଜଣେ ସୁନ୍ଦର ବଗିଚା ବନେଇଲେ, ଆଉ ଜଣେ ପ୍ରବାସୀ ଶ୍ରମିକଙ୍କୁ ସାହାଯ୍ୟ କଲେ

ବ୍ୟବହାର ଅନୁପଯୋଗୀ ସାମଗ୍ରୀ ବ୍ୟବହାର କରି ଘରେ ସୁନ୍ଦର ବଗିଚା ବନେଇଛନ୍ତି ସ୍କୁଲ ଓ ଗଣ ଶିକ୍ଷା ବିଭାଗ ଉପ-ନିର୍ଦେଶିକା ଡଃ ସିପ୍ରା ନାୟକ । ସମାଜସେବୀ ମାନସ ପଟ୍ଟନାୟକ ପାଖାପାଖି ୫୦,୦୦୦ ଓଡ଼ିଆ ଶ୍ରମିକଙ୍କୁ ସାହାଯ୍ୟ କରିଛନ୍ତି ।

ଲକଡାଉନରେ ଜଣେ ସୁନ୍ଦର ବଗିଚା ବନେଇଲେ, ଆଉ ଜଣେ ପ୍ରବାସୀ ଶ୍ରମିକଙ୍କୁ ସାହାଯ୍ୟ କଲେ
ଡଃ ସିପ୍ରା ନାୟକ ନିଜ ଘରେ ବନେଇଥିବା ବଗିଚା
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ଭୁବନେଶ୍ୱର: ଲକଡାଉନରେ କାର୍ଯ୍ୟରୁ ମିଳିଥିବା ଫୁରସତର ସୁବ୍ୟବହାର କରିଛନ୍ତି ଅନେକ ଲୋକ । ଘରର ଅନାବନା ଜିନିଷରେ ଗଛ ଲଗେଇ ସୁନ୍ଦର ଭାବରେ ଏକ ଫୁଲ ବଡିଚା ସଜେଇଛନ୍ତି ଗଣ ଶିକ୍ଷା ବିଭାଗର ଉପନିର୍ଦ୍ଦେଶକ ଡକ୍ଟର ସିପ୍ରା ନାୟକ ଓ ତାଙ୍କ ଶିକ୍ଷାବିତ ପତି ଉପେନ୍ଦ୍ର ନାଥ ମହାନ୍ତି। ମୋବାଇଲ ମାଧ୍ୟମରେ ରାଜ୍ୟ ବାହାରେ ଫସିରହିଥିବା ପ୍ରବାସୀ ଶ୍ରମିକଙ୍କୁ  ସାହାଯ୍ୟ କରୁଛନ୍ତି ଯୁବ ସମାଜସେବୀ ମାନସ ପଟନାୟକ ।

ସିପ୍ରା ନାୟକଙ୍କତ ଘର ଭିତର ବାହାର ସବୁଠି ଗଛ ଆଉ ଗଛ। ଗଛରେ ଖୁବ୍‌ ସୁନ୍ଦରଭାବେ ନିଜ ଘରକୁ ସଜାଇଛନ୍ତି ସେ ଓ ତାଙ୍କ ସ୍ୱାମୀ । ଘର ଅଗଣାରେ ପୁରୁଣା ଟାୟାର ଓ ପୁରୁଣା ବୋତଲ ଆଦି ବ୍ୟବହାର ଅନୁପୋଯୋଗୀ ପଦାର୍ଥକୁ ପାତ୍ର ବନେଇ ଛୋଟ ବଡ଼ ଫୁଲ ଗଛକୁ ସଜାଇଛନ୍ତି ଦୁହେଁ । କେବଳ ଫୁଲ ନୁହେଁ ଲେମ୍ବୁ, ସପୁରୀ ଓ ଲାଙ୍କ ଭଳି ଗଛ ବି ଶୋଭାପାଉଛି ତାଙ୍କ ଘର ଅଗଣାରେ ।

ସରିଯାଇଥିବା ମଶାମରା ଲିକ୍ୱିଡରେ ବି ଲାଗିଛି ଗଛ । ଘରର ଭିତର ପାର୍ଶ୍ୱରେ ଭଙ୍ଗା ଚପଲ ଷ୍ଟାଣ୍ଡ, ନଡିଆ ଖୋଳ ଓ ଦୀପରେ ଲାଗିଛି ରଙ୍ଗ ବେରଙ୍ଗର ଗଛ । ଲକଡାଉନ ସମୟରେ ଏ ସବୁ କରିଛନ୍ତି ବୋଲି କହିଛନ୍ତି ସିପ୍ରା । କେବଳ ସେ ନୁହଁନ୍ତି, ତାଙ୍କ ପରିବାରର ସମସ୍ତ ସଦସ୍ୟ ଲାଗିପଡ଼ିଥାନ୍ତି ଗଛ ଲଗାଇବା କାମରେ ।

ଡଃ ନାୟକଙ୍କ ଘରେ ଗ୍ରୀଲରେ ସଜାଯାଇଥିବା ବଗିଚା


‘‘ଚାକିରୀ ସମୟରେ ସମୟ ମିଳୁ ନ ଥିଲ । ଲକଡାଉନ ସମୟରେ ଭରପୁର ସମୟ ମିଳିଲା । ଅନାବନା ଜିନିଷକୁ ଡେକୋରେଟର ଭଳି ସଜାଇଲୁ । ଗଛ ପ୍ରତି ଆଗ୍ରହ ଥିଲା । ଲକଡାଉନ ପାଇଁ ବାହାରୁ କୁଣ୍ଡ ନ ମିଳିବାରୁ ଘରେ ଯାହା ଥିଲା ପ୍ଲାଷ୍ଟିକ ଓ ଭଙ୍ଗା ଜିନିଷରେ ଗଛ ଲଗାଇଲୁ । ଲକଡ଼ାଉନ ସମୟରେ ଘର କାମକୁ ନେଇ ଆକଟିଭ୍‌ ହୋଇଛୁ । ସ୍ୱାମୀ, ବୋହୁ, ନାତୁଣୀ ସମସ୍ତେ କାମରେ ଲାଗିଥାନ୍ତି । ସକାଳେ ଯୋଗ ଓ ସନ୍ଧ୍ୟାରେ ପ୍ରାର୍ଥନା ଭଜନ କରି ସମୟ କଟିଥାଏ,’’ କହିଛନ୍ତି ସିପ୍ରା ।

ସମାଜସେବୀ ମାନସ ପଟ୍ଟନାୟକ ଲକଡାଉନ୍‌ ସମୟକୁ ରାଜ୍ୟ ବାହାରେ ଫସିରହିଥିବା ଶ୍ରମିକଙ୍କୁ ସାହାଯ୍ୟ କରିବାରେ ବିତାଉଛନ୍ତି । ଲକଡାଉନରେ ବିଭିନ୍ନ ସ୍ଥାନରେ ଫସିଥିବା ଶ୍ରମିକଙ୍କ ସ୍ଥିତି ଅତ୍ୟନ୍ତ ଦୟନୀୟ ହୋଇପଡିଥିଲା । ମାନସ ଘରେ ରହି ସରକାରଙ୍କ ଲକଡାଉନ ନିୟମକୁ ମାନି ନିଜେ ଗଢ଼ିଥିବା ସଂସ୍ଥା ଓଡ଼ିଶା ଡିଷ୍ଟ୍ରେସ୍‌ ମ୍ୟାପିଂ ଆଣ୍ଡ ଇଣ୍ଟରଭେନସନ ଇନିସିଏଟିଭ ଦ୍ୱାରା ପାଖାପାଖି ୫୦ ହଜାର ଓଡ଼ିଆ ଶ୍ରମିକଙ୍କୁ ସାହାଯ୍ୟ କରିଛନ୍ତି ।

ସମାଜ ସେବୀ ମାନସ ପଟ୍ଟନାୟକ


‘‘ବରିଷ୍ଠ ସାମ୍ବାଦିକ, ସ୍ବେଚ୍ଛାସେବୀ ଓ ସମାଜସେବୀଙ୍କୁ ନେଇ ଏହି ଗ୍ରୁପ ବନେଇଛୁ । ଏଇ ଗ୍ରୁପ ଜରିଆରେ ଅସୁବିଧାରେ ପଡିଥିବା ଶ୍ରମିକମାନଙ୍କ ସମସ୍ୟାର ଖବର ଆସେ । ଯେଉଁ ଅଞ୍ଚଳର ଶ୍ରମିକ ଅସୁବିଧାରେ ଥା’ନ୍ତି ଆମେ ତାଙ୍କ ସହ ଯୋଗାଯୋଗ କରୁ । ତା’ପରେ ତୁରନ୍ତ ଓଡିଶା ସରକାରଙ୍କ ସମେତ ଶ୍ରମିକ ଫସିଥିବା ରାଜ୍ୟ ସରକାରଙ୍କ ଦୃଷ୍ଟିକୁ ସେମାନଙ୍କ ସମସ୍ୟା ଆଣୁ । ଟ୍ୱିଟ କରି ସୋସିଆଲ ମିଡ଼ିଆ ମାଧ୍ୟମରେ ସରକାରଙ୍କୁ ନିବେଦନ କରୁ,’’ ସେ କହିଛନ୍ତି ।

ଅନ୍ୟ ପ୍ରଦେଶରେ ରହିଥିବା ବିଭିନ୍ନ ସାମାଜିକ ଅନୁଷ୍ଠାନଗୁଡ଼ିକୁ ମଧ୍ୟ ଓଡ଼ିଆ ଶ୍ରମିକଙ୍କୁ ରାସନ ଓ ଖାଦ୍ୟ ପହଞ୍ଚେଇବା ପାଇଁ ଅନୁରୋଧ କରେ ତାଙ୍କ ସଙ୍ଗଠନ । କେବଳ କୋଭିଡ-୧୯ ନୁହେ, ପୂର୍ବରୁ ୧୯୯୯ ମହାବାତ୍ୟା ଓ ଗଲା ବର୍ଷର ଫନି ମହା ବାତ୍ୟା ସମୟରେ ବି ଅନେକ ଲୋକଙ୍କୁ ସାହଯ୍ୟ କରିଛନ୍ତି ମାନସ ପଟ୍ଟନାୟକ ।
First published: May 4, 2020, 1:19 PM IST
corona virus btn
corona virus btn
Loading