ଗୃହ ମନ୍ତ୍ରୀ ଅମିତ ଶାହା କରୋନା ଭାଇରସ୍‌ରେ ସଂକ୍ରମିତ ହେଲେ, ହସପିଟାଲରେ ଭର୍ତ୍ତି ହେଲେ

News18 Odia Digital

ନୂଆ ଦିଲ୍ଲୀ: କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା (Amit Shah) କରୋନା ଭାଇରସରେ (Coronavirus) ସଂକ୍ରମିତ ହୋଇଥିବା ଜଣାପଡ଼ିଛି । ସେ ନିଜେ ଟ୍ୱିଟ୍ କରି ଏହା ବିଷୟରେ ସୂଚନା ଦେଇଛନ୍ତି। ଗୃହ ମନ୍ତ୍ରୀ ଏକ ଟ୍ୱିଟରେ କହିଛନ୍ତି ଯେ ସେ ନିଜ ଠାରେ କରୋନାର ପ୍ରାଥମିକ ଲକ୍ଷଣ ଦେଖିବା ପରେ ଏକ ଟେଷ୍ଟ୍‌ କରାଇଥିଲେ । ଟେଷ୍ଟ୍‌ ରିପୋର୍ଟରେ ସେ କୋଭିଡ-୧୯ ଦ୍ୱାରା ସଂକ୍ରମିତ ହୋଇଥିବା ଜଣା ପଡ଼ିଛି (Amit Shah Corona Positive) ।

ଅମିତ ଶାହା କହିଛନ୍ତି ଯେ ତାଙ୍କ ସ୍ୱାସ୍ଥ୍ୟ ଅବସ୍ଥା ଭଲ ଅଛି, କିନ୍ତୁ ଡାକ୍ତରଙ୍କ ପରାମର୍ଶ ଅନୁସାରେ ସେ ହସପିଟାଲରେ ଭର୍ତ୍ତି ହୋଇଛନ୍ତି । ନିକଟରେ ତାଙ୍କ ସହ ଯୋଗାଯୋଗ କରିଥିବା ସବୁ ଲୋକଙ୍କୁ ସେ ଅନୁରୋଧ କରିଛନ୍ତି ଯେ ସେମାନେ ନିଜକୁ ଅଲଗା କରି (ଆଇସୋଲେଟ୍‌) ରଖନ୍ତୁ ଏବଂ ନିଜର କରୋନା ପରୀକ୍ଷା କରାନ୍ତୁ ।

ଅଗଷ୍ଟ ୫ରେ ହେବାକୁ ଥିବା ଅଯୋଧ୍ୟା ରାମ ମନ୍ଦିରର ଭୂମି ପୂଜନ କାର୍ଯ୍ୟକ୍ରମରେ ଏବେ ଅମିତ ଶାହଙ୍କ ଭାଗ ନେବା ଉପରେ ସଂଶୟ ଦେଖାଦେଇଛି । ଅଯୋଧ୍ୟାରେ ରାମ ମନ୍ଦିରର ଭୂମି ପୂଜନ ଉପରେ ସମଗ୍ର ଦେଶର ନଜର ରହିଛି । ଅଗଷ୍ଟ ୫ରେ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କ (PM Narendra Modi) କର କମଳରେ ଭୂମି ପୂଜନ ହେବ । ଏଥି ପାଇଁ ପ୍ରସ୍ତୁତି ଜୋରସୋରରେ ଚାଲିଛି ।

कोरोना के शुरूआती लक्षण दिखने पर मैंने टेस्ट करवाया और रिपोर्ट पॉजिटिव आई है। मेरी तबीयत ठीक है परन्तु डॉक्टर्स की सलाह पर अस्पताल में भर्ती हो रहा हूँ। मेरा अनुरोध है कि आप में से जो भी लोग गत कुछ दिनों में मेरे संपर्क में आयें हैं, कृपया स्वयं को आइसोलेट कर अपनी जाँच करवाएं।

— Amit Shah (@AmitShah) August 2, 2020

ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ କିଛି ଘଣ୍ଟା ପୂର୍ବରୁ ବିବୃତ୍ତି ଦେଇ କହିଥିଲେ ଯେ ଗୃହ ମନ୍ତ୍ରୀ ଅମିତ ଶାହା ଭୂମି ପୂଜନ କାର୍ଯ୍ୟକ୍ରମରେ ଯୋଗ ଦେବେ ନାହିଁ । ରାୟ କହିଥିଲେ ଯେ ଶାହ ପରବର୍ତ୍ତୀ ସମୟରେ ଅଯୋଧ୍ୟାକୁ ଆସିବେ ।

ଏହା ବି ପଢ଼ନ୍ତୁ: ଭାରତରେ ଲଞ୍ଚ୍ ହେଲା କରୋନାର ଏ ପର୍ଯ୍ୟନ୍ତ ସବୁ ଠୁ ଶସ୍ତା ଔଷଧ; କେତେ ଦାମ୍ ଜାଣନ୍ତୁ

ଏହା ବି ପଢ଼ନ୍ତୁ: Rakhi Purnima: ବାରାଣସୀରେ ମୁସଲିମ୍ ମହିଳାମାନେ ମୋଦିଙ୍କ ପାଇଁ ତିଆରି କରୁଛନ୍ତି ସ୍ୱଦେଶୀ ରାକ୍ଷୀ



ରାମ ମନ୍ଦିର ଭୂମି ପୂଜନ ପାଇଁ ସମସ୍ତ ବ୍ୟବସ୍ଥା ଶେଷ ହୋଇଛି ଓ ସାଧୁସନ୍ଥମାନଙ୍କ ରହିବା ପାଇଁ ମଧ୍ୟ ବ୍ୟବସ୍ଥା କରାଯାଇଛି ବୋଲି କହିଥିଲେ ରାୟ । ସେ କହିଥିଲେ ଯେ ଏହି ସମାରୋହକୁ ନିମନ୍ତ୍ରଣ ପାଇଥିବା ଅତିଥିମାନଙ୍କୁ ଏକ ସୁରକ୍ଷା କୋଡ୍ ମିଳିବ । ଯିଏ ଥରେ ସମାରୋହ ସ୍ଥଳରୁ ବାହାରକୁ ଆସିବେ, ତାଙ୍କୁ ଆଉ ପ୍ରବେଶ ମିଳିବ ନାହିଁ ବୋଲି ସେ କହିଥିଲେ ।