Gold & Silver Price: ସୁନା ଓ ରୂପା ୧,୯୩୩ ଟଙ୍କା ପର୍ଯ୍ୟନ୍ତ ଶସ୍ତା ହେଲା; ଜାଣନ୍ତୁ ନୂଆ ଦର

News18 Odia Digital

ନୂଆ ଦିଲ୍ଲୀ: ଆନ୍ତର୍ଜାତୀୟ ସ୍ତରରେ ଦାମ୍‌ କମିଥିବା କାରଣରୁ ଘରୋଇ ବଜାରରେ ଏବେ ସୁନା କିଣିବା ଶସ୍ତା ହୋଇଛି। ଦିଲ୍ଲୀରେ ୧୦ ଗ୍ରାମ ସୁନା (Gold Price Today) ଦାମ୍‌ ୧୮୭ ଟଙ୍କା ହ୍ରାସ ପାଇଛି । ଏଥି ସହିତ ଏହି ସମୟ ମଧ୍ୟରେ ରୂପା ଦାମରେ (Silver Price Today) କିଲୋଗ୍ରାମ ପିଛା ୧,୯୩୩ ଟଙ୍କା ହ୍ରାସ ପାଇଛି । ତେବେ ଆଗାମୀ ଦିନରେ ଦାମ୍‌ ପୁଣି ବଢ଼ିପାରେ ବୋଲି ବିଶେଷଜ୍ଞମାନେ କହିଛନ୍ତି।

ଆମେରିକା ଓ ଚୀନ୍ ମଧ୍ୟରେ ଉତ୍ତେଜନା ଜାରି ରହିଥିବା କାରଣରୁ ଆମେରିକୀୟ ଡଲାର ଦୁର୍ବଳ ହେଉଛି । ଏହାର ପ୍ରଭାବ ସୁନା ଦାମ୍‌ ଉପରେ ସ୍ପଷ୍ଟ ଦେଖାଯାଉଛି । ଏଥି ସହିତ ଆମେରିକାର ବଣ୍ଡ ଅମଳରେ ତୀବ୍ର ହ୍ରାସ ଘଟିଛି । ଏପରି ପରିସ୍ଥିତିରେ ନିବେଶକମାନେ ସୁରକ୍ଷିତ ନିବେଶ ପାଇଁ ସୁନା ଓ ରୂପା କିଣିବା ଆରମ୍ଭ କରିପାରିବେ ।

ସୁନାର ନୂଆ ଦାମ୍‌ (Gold Price on 28 July 2020)

ମଙ୍ଗଳବାର ଦିନ ଦିଲ୍ଲୀ ବୁଲିଅନ୍ ମାର୍କେଟ (Bullion Market) ରେ ୯୯.୯ ପ୍ରତିଶତ ଶୁଦ୍ଧତା ଥିବା ସୁନା ଦଶ ଗ୍ରାମ ପିଛା ୫୩,୦୩୩ ଟଙ୍କାରୁ ଖସି ଦଶ ଗ୍ରାମକୁ ୫୨,୮୪୬ ଟଙ୍କା ହୋଇଛି । ଏହି ଅବଧିରେ ସୁନାର ଦାମ୍‌ ଦଶ ଗ୍ରାମ ପିଛା ୧୮୭ ଟଙ୍କା ହ୍ରାସ ପାଇଛି । ଏଥି ସହିତ ମୁମ୍ବାଇରେ ୯୯.୯ ପ୍ରତିଶତ ଶୁଦ୍ଧତା ଥିବା ସୁନାର ଦାମ୍‌ ୫୨,୫୨୫ ଟଙ୍କାକୁ ଖସି ଆସିଛି।

ରୂପାର ଦାମ୍‌ (Silver Price on 28 July 2020)

ମଙ୍ଗଳବାର ଦିନ ରୂପାର ଦାମରେ କିଲୋଗ୍ରାମ ପିଛା ୧,୯୩୩ ହ୍ରାସ ଦେଖାଦେଇଛି । ଏହା ପରେ ଏବେ ନୂଆ ଦାମ୍‌ ୬୪,୨୯୭ ଟଙ୍କା ରହିଛି । ଏହା ପୂର୍ବରୁ ରୂପା ମୂଲ୍ୟ କିଲୋଗ୍ରାମ ପିଛା ୬୬,୨୩୦ ଟଙ୍କା ଥିଲା ।



ଆନ୍ତର୍ଜାତୀୟ ସ୍ତରରେ ସୁନା ଓ ରୂପା ଦାମ୍‌ କେତେ ଅଛି?

HDFC ସିକ୍ୟୁରିଟି ଅନୁଯାୟୀ ଆନ୍ତର୍ଜାତୀୟ ସୁନା ମୂଲ୍ୟ ହ୍ରାସ ହୋଇ ଆଉନ୍ସ୍‌ ପିଛା ୧,୯୨୩ ଡଲାର୍‌ ହୋଇଛି । ରୂପାର ଦାମ୍‌ ବି କମି ଆଉନ୍ସ ପିଛା ୨୩.୬୦ ଡଲାର ହୋଇଛି ।

ଗୋଟିଏ ସପ୍ତାହରେ ରୂପା ଦାମ୍‌ ୨୫% ବୃଦ୍ଧି ପାଇଛି

ଗତ ଚାରି ମାସ ମଧ୍ୟରେ ରୂପାର ଦାମ୍‌ ଦ୍ୱିଗୁଣିତ ହୋଇଯାଇଛି । ଚଳିତ ବର୍ଷ ମାର୍ଚ୍ଚ ୧୮ରେ ଦ୍ରବ୍ୟ ବିନିମୟ MCX ରେ ରୂପାର ଦାମ୍‌ କିଲୋଗ୍ରାମ ପିଛା ପ୍ରାୟ ୩୩,୫୮୦ ଟଙ୍କା ଥିଲା । ଜୁଲାଇ ୨୮ରେ ଏହାର ଦାମ୍‌ କିଲୋଗ୍ରାମ ପିଛା ୬୭,୫୬୦ ଟଙ୍କାକୁ ବୃଦ୍ଧି ପାଇଛି । ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ରୂପାର ଦାମରେ ବୃଦ୍ଧି ହୋଇପାରେ। ଗତ ଏକ ସପ୍ତାହରେ MCXରେ ରୂପାର ଦାମ୍‌ ୨୫ ପ୍ରତଶତ ବୃଦ୍ଧି ପାଇଛି। ମଙ୍ଗଳବାର ଦିନ ରୂପା ପ୍ରତି କିଲୋଗ୍ରାମ ୬୭,୫୬୦ ଟଙ୍କାରେ ପହଞ୍ଚିଛି । ଗତ ସପ୍ତାହର ଶେଷରେ ରୂପାର ଦାମ୍‌ ପ୍ରାୟ ୫୪,୦୦୦ ଟଙ୍କା ଥିଲା।

ଏହା ବି ପଢ଼ନ୍ତୁ: କରୋନା କବଚ ବୀମା ପଲିସି ଖୁବ୍ ଲୋକପ୍ରିୟ ହେଉଛି; ଏଥିରୁ କ’ଣ ଓ କେମିତି ଲାଭ ମିଳୁଛି ଜାଣନ୍ତୁ

ଏହା ବି ପଢ଼ନ୍ତୁ: ଭାରତରେ PUBG ସମେତ ଆହୁରି ୨୭୫ଟି ଚାଇନିଜ୍ ଆପ୍ ଖୁବ୍ ଜଲଦି ବ୍ୟାନ୍ ହୋଇପାରେ

ଏହା ବି ପଢ଼ନ୍ତୁ: ସୁଶାନ୍ତ ସିଂ ରାଜପୁତ ଆତ୍ମହତ୍ୟା: ତାଙ୍କ ବାପା ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ବିରୋଧରେ FIR ଦେଲେ

ରୂପାର ଦାମ୍‌ ୭୫ ହଜାର ଟଙ୍କାରେ ପହଞ୍ଚିପାରେ

କେଡ଼ିଆ କମୋଡିଟିଜ (Kedia Commodities) ର ନିର୍ଦ୍ଦେଶକ ଅଜୟ କେଡ଼ିଆ (Ajay Kedia) କହିଛନ୍ତି ଯେ କରୋନା ଭୂତାଣୁ ସଂକ୍ରମଣ ବଢ଼ୁଥିବାରୁ ଓ କେନ୍ଦ୍ରୀୟ ବ୍ୟାଙ୍କରୁ ରିଲିଫ ପ୍ୟାକେଜ ମିଳିବାର ଆଶା ଥିବାରୁ ସୁନା ଓ ରୂପାର ଦାମ୍‌ ବୃଦ୍ଧି ପାଉଛି । ଏଥି ସହ ଆମେରିକା ଓ ଚୀନ୍ ମଧ୍ୟରେ ଚାଲିଥିବା ତିକ୍ତତା କାରଣରୁ ନିବେଶକମାନଙ୍କ ପାଇଁ ରୂପା ନିବେଶର ସର୍ବୋତ୍ତମ ମାଧ୍ୟମ ହୋଇଛି । ତେଣୁ ଆଗାମୀ ସମୟରେ ରୂପାର ଦାମ୍‌ ବୃଦ୍ଧି ହୋଇପାରେ । ସେ କହିଛନ୍ତି ଯେ ଦୀପାବଳୀ ସମୟରେ ରୂପାର ଦାମ୍‌ କିଲୋଗ୍ରାମ୍‌ ପିଛା ୭୫ ହଜାର ଟଙ୍କା ପର୍ଯ୍ୟନ୍ତ ଯାଇପାରେ ।