କେନ୍ଦୁଝରରେ ମୃତ ବ୍ୟକ୍ତିମାନଙ୍କ ନାଁରେ କୋଭିଡ୍ ସହାୟତା ରାଶି ଖାଇଗଲେ ସରକାରୀ ଅଧିକାରୀ

୧୪ ଜଣ ମୃତ ବ୍ୟକ୍ତିଙ୍କ ନାଁରେ କୋଭିଡ ସହାୟତା ରାଶି ଉଠାଇ ହଡ଼ପ କରାଯାଇଛି । ବର୍ଷ ବର୍ଷ ଧରି ଏହି ମୃତ ବ୍ୟକ୍ତିମାନଙ୍କ ନାଁରେ ରାସନ୍ ସାମଗ୍ରୀ ମଧ୍ୟ ହଡ଼ପ ହୋଇଆସୁଥିବା ଅଭିଯୋଗ ହୋଇଛି ।

ସାହାରପଡ଼ା ବ୍ଲକର ଉଦୟପୁର ଗ୍ରାମ ପଞ୍ଚାୟତ କାର୍ଯ୍ୟାଳୟ

ସାହାରପଡ଼ା ବ୍ଲକର ଉଦୟପୁର ଗ୍ରାମ ପଞ୍ଚାୟତ କାର୍ଯ୍ୟାଳୟ

  • News18 Odia
  • Last Updated :
  • Share this:
ଅଭୟ କୁମାର ମହାପାତ୍ର | News18 Odia Digital

କେନ୍ଦୁଝର: ସରକାର କୋଭିଡରେ ପ୍ରଭାବିତ ଲୋକଙ୍କୁ ଆର୍ଥିକ ସହାୟତା ଦେଇ ସେମାନଙ୍କ କଷ୍ଟ ଲାଘବ କରିବାକୁ ଚେଷ୍ଟା କରିଥିବା ବେଳେ ମୃତ ହିତାଧିକାରୀଙ୍କ ନାଁରେ କୋଭିଡ୍ ସହାୟତା ରାଶି ହଡ଼ପ କରାଯାଇଥିବା ଜଣାପଡ଼ିଛି । ଜଣେ କି ଦୁଇ ଜଣ ନୁହେଁ, ବରଂ ୧୪ ଜଣ ମୃତ ବ୍ୟକ୍ତିଙ୍କ ନାଁରେ ୧,୦୦୦ ଟଙ୍କା ଲେଖାଏଁ କୋଭିଡ୍ ସହାୟତା ରାଶି ହଡ଼ପ କରାଯାଇଛି । ଖାଲି ସେତିକି ନୁହେଁ, ଏହି ମୃତ ବ୍ୟକ୍ତିମାନଙ୍କ ନାଁରେ ବର୍ଷ ବର୍ଷ ଧରି ରାସନ୍ ସାମଗ୍ରୀ ମଧ୍ୟ ହଡ଼ପ କରାଯାଉଥିବା ସାମନାକୁ ଆସିଛି ।

ଏମିତି ସଙ୍ଗୀନ ଅଭିଯୋଗ ଆସିଛି କେନ୍ଦୁଝର ଜିଲ୍ଲା ସାହାରପଡ଼ା ବ୍ଲକର ଉଦୟପୁର ଗ୍ରାମ ପଞ୍ଚାୟତରୁ । ଗତ ବର୍ଷ ହିତାଧିକାରୀଙ୍କ ପାଇଁ ଆସିଥିବା ୧,୦୦୦ ଟଙ୍କା ଲେଖାଏଁ କୋଭିଡ୍ ସହାୟତା ରାଶି ମୃତ ବ୍ୟକ୍ତିମାନଙ୍କ ନାଁରେ ଉଠାଇ ହଡ଼ପ କରାଯାଇଛି । ଏମିତି ୧୪ ଜଣ ମୃତ ବ୍ୟକ୍ତିଙ୍କ ନାଁରେ କୋଭିଡ୍ ସହାୟତା ରାଶି ଉଠାଇ ବ୍ଲକର ଯୋଗାଣ ସହାୟକ ସ୍ବରୂପ କୁମାର ରାଜ୍ ହଡ଼ପ କରିଥିବା ଖୋଦ୍ ସରପଞ୍ଚ ଅଭିଯୋଗ କରିଛନ୍ତି । ବିଡିଓ ଏହି ଜାଲିାତିର ତଦନ୍ତ କରି ଏହାର ରିପୋର୍ଟ ଉପଜିଲ୍ଲାପାଳଙ୍କୁ ପ୍ରଦାନ କରିଥିବା ସେ କହିଛନ୍ତି । ଉପଜିଲ୍ଲାପାଳ କହିଛନ୍ତି ଯେ ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଏହା ବି ପଢ଼ନ୍ତୁ | Railway Recruitment 2021: ଦଶମ ଶ୍ରେଣୀ ପାସ୍ କରିଥିଲେ ବିନା ପରୀକ୍ଷାରେ ରେଳବାଇରେ ଚାକିରି

‘‘ଗତ ବର୍ଷ ମହାମାରୀ ସମୟରେ ହିତାଧିକାରୀମାନଙ୍କୁ ସରକାର ୧,୦୦୦ ଟଙ୍କା ଲେଖାଏଁ କୋଭିଡ୍ ସହାୟତା ଯୋଗାଇ ଦେଉଥିଲେ । ଏହାକୁ ବ୍ଲକର ଯୋଗାଣ ସହାୟକ ବଣ୍ଟନ କରୁଥିଲେ । କିଛି ଦିନ ପରେ ୱାର୍ଡ୍ ମେମ୍ବରମାନେ ଆସି ଅଭିଯୋଗ କଲେ ଯେ ଏହି ବଣ୍ଟନ ତାଲିକାରେ କିଛି ମୃତ ବ୍ଯକ୍ତିଙ୍କର ନାଁ ରହିଛି । ୱାର୍ଡ୍ ମେମ୍ବରଙ୍କର ଲିଖିତ ଅଭିଯୋଗକୁ ଭିତ୍ତି କରି ମୁଁ ବିଡିଓଙ୍କୁ ଅଭିଯୋଗ କରିଥିଲି ଯେ କିଛି ମୃତ ବ୍ଯକ୍ତିଙ୍କ ନାଁରେ ଯୋଗାଣ ସହାୟକ ଏହି ସହାୟତା ରାଶି ହଡ଼ପ କରିଛନ୍ତି । ବିଡିଓ ଏହି ଘଟଣାର ତଦନ୍ତ କରି ଉପଜିଲ୍ଲାପାଳଙ୍କୁ ଏହି ରିପୋର୍ଟ ପ୍ରଦାନ କରିଛନ୍ତି,’’ କହିଛନ୍ତି ଉଦୟପୁର ଗ୍ରାମ ପଞ୍ଚାୟତର ସରପଞ୍ଚ ସତ୍ୟ ନାରାୟଣ ନାଏକ ।

୧୪ ଜଣ ମୃତ ବ୍ୟକ୍ତିଙ୍କ ନାଁରେ କୋଭିଡ୍ ସହାୟତା ରାଶି ହଡ଼ପ କରାଯାଇଛି ।


ଏହା ବି ପଢ଼ନ୍ତୁ | Jio, Airtel Vodafone ସବୁଠୁ ଭଲ ପ୍ଲାନ୍: ଥରେ ରିଚାର୍ଜ କରି ବର୍ଷ ସାରା ଫ୍ରି କଲିଂ ଡାଟା

‘‘ମୋ’ ବଡ଼ମା ମନ୍ଦରୀ ପାତ୍ର ପାଞ୍ଚ ବର୍ଷ ହେବ ମୃତ୍ୟୁ ବରଣ କଲେଣି । ହେଲେ ତାଙ୍କ ନାଁରେ ଆସିଥିବା କୋଭିଡ୍ ସହାୟତା ରାଶି ଆମକୁ ମିଳି ନାହିଁ । ସେ ମୃତ୍ୟୁ ବରଣ କରିବା ପରେ ଆମେ ପଞ୍ଚାୟତରୁ କୌଣସି ରାସନ୍ ସାମଗ୍ରୀ ମଧ୍ୟ ପାଉ ନାହୁଁ,’’ କହିଛନ୍ତି ସ୍ଥାନୀୟ ଅଞ୍ଚଳର ବନମାଳୀ ପାତ୍ର ।

ଏହା ବି ପଢ଼ନ୍ତୁ ଦେଖନ୍ତୁ ଫଟୋ | କ୍ରିକେଟ୍ ଖେଳାଳି ଶିଖର ଧାୱନ୍ ପତ୍ନୀ ଆୟେଶା ମୁଖାର୍ଜୀଙ୍କୁ ଛାଡ଼ପତ୍ର ଦେଲେ; ‘‘…ବହୁତ ଭୟାନକ ଥିଲା’’

ଉଦୟପୁର ଗ୍ରାମ ପଞ୍ଚାୟତର ୧,୩୬୫ ଜଣ ଲୋକଙ୍କ ପାଇଁ ଆସିଥିବା କୋଭିଡ୍ ସହାୟତା ରାଶି ଯୋଗାଣ ସହାୟକ ସମସ୍ତଙ୍କୁ ପ୍ରଦାନ କରାଯାଇଛି ବୋଲି ଲେଖିଥିବା ବେଳେ ୧,୩୬୦ ଜଣଙ୍କୁ ଏହି ରାଶି ପ୍ରଦାନ କରାଯାଇଥିବା କାଗଜପତ୍ରରେ ଦର୍ଶାଇଛନ୍ତି । ହେଲେ ଏହି ୧,୩୬୦ ଜଣଙ୍କ ମଧ୍ୟରେ ରହିଛନ୍ତି ୧୪ ଜଣ ମୃତ ବ୍ୟକ୍ତି । ସେମାନଙ୍କ ନାଁରେ ସହାୟତା ରାଶି ଉଠାଇ ହଡ଼ପ କରାଯାଇଛି । ବର୍ଷ ବର୍ଷ ଧରି ଏହି ମୃତ ବ୍ୟକ୍ତିମାନଙ୍କ ନାଁରେ ରାସନ୍ ସାମଗ୍ରୀ ମଧ୍ୟ ହଡ଼ପ ହେଉଥିବା ଅଭିଯୋଗ ହୋଇଛି । ଅଭିଯୋଗର ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଉପଜିଲ୍ଲାପାଳ ।

ଏହା ବି ପଢ଼ନ୍ତୁ | Taliban Rule: ଆଫଗାନିସ୍ତାନରେ କ୍ଲାସ୍ରୁମରେ ଛାତ୍ର ଛାତ୍ରୀଙ୍କ ମଧ୍ଯରେ ପରଦା ଟଣାଯାଉଛି!

‘‘ଏ ସମ୍ପର୍କରେ ଅଭିଯୋଗ ଆମର ହସ୍ତଗତ ହୋଇଛି । ଏଥିରେ କେତେ ଅନିୟମିତତା ଅଛି ତାହା ଅନୁଧ୍ୟାନ କରି ଆବଶ୍ୟକ ସ୍ଥଳେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ,’’ କହିଛନ୍ତି ଉପଜିଲ୍ଲାପାଳ ରାମଚନ୍ଦ୍ର କିସ୍କୁ ।



ଉପଯୁକ୍ତ ହିତାଧିକାରୀମାନଙ୍କୁ ସରକାରୀ ସହାୟତା ପ୍ରଦାନ ନ କରି ମୃତ ବ୍ୟକ୍ତିମାନଙ୍କ ନାଁରେ ଟଙ୍କା ହଡ଼ପ କରୁଥିବା ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ପ୍ରଶାସନ ନିକଟରେ ଦାବି କରିଛନ୍ତି ।
Published by:Anand S.T. Das
First published: