କରୋନା ମୁକାବିଲା ପାଇଁ ମୋଦିଙ୍କ ‘ଜନତା କର୍ଫ୍ୟୁ’ ଆହ୍ବାନକୁ ରାଜ୍ୟର ସବୁ ଦଳଙ୍କ ଭରପୁର ସମର୍ଥନ

ପ୍ରଧାନ ମନ୍ତ୍ରୀଙ୍କ କଥା ରଖି ରାଜ୍ୟବାସୀ ଆସନ୍ତା କାଲି ‘ଜନତା କର୍ଫ୍ୟୁ’ ପାଳନ କରିବାକୁ ଅନୁରୋଧ କରିଛି ରାଜ୍ୟ ବିଜେପି । ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ଏହାକୁ ସମର୍ଥନ କରିଛନ୍ତି । କଂଗ୍ରେସ ବି ଲୋକଙ୍କୁ ଏଥିରେ ଭାଗନେବାକୁ କହିଛି ।

କରୋନା ମୁକାବିଲା ପାଇଁ ମୋଦିଙ୍କ ‘ଜନତା କର୍ଫ୍ୟୁ’ ଆହ୍ବାନକୁ ରାଜ୍ୟର ସବୁ ଦଳଙ୍କ ଭରପୁର ସମର୍ଥନ
(ପ୍ରତୀକାତ୍ମକ ଛବି)
  • News18 Odia
  • Last Updated: March 21, 2020, 8:45 PM IST
  • Share this:
  • Byline Facebook
  • Byline Twitter
  • Byline Linkedin
News18 Odia Digital

ଭୁବନେଶ୍ବର: କରୋନା ଭାଇରସର ମୁକାବିଲା ଲାଗି ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ଦେଇଥିବା ‘ଜନତା କର୍ଫ୍ୟୁ’ ଆହ୍ବାନକୁ ରାଜ୍ୟରେ ମିଳୁଛି ଭରପୂର ସମର୍ଥନ ।  ଆସନ୍ତା କାଲି ସକାଳ ୭ରୁ ରାତି ୯ ପର୍ଯ୍ୟନ୍ତ ୧୪ ଘଣ୍ଟା ପାଇଁ ଘର ଭିତରେ ରହିବାକୁ ସର୍ବସାଧାରଣଙ୍କୁ ମୋଦି ଆହ୍ବାନ ଦେଇଛନ୍ତି । ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ଏହାକୁ ସମର୍ଥନ କରିଛନ୍ତି ବୋଲି କୋଭିଡ-୧୯ ମୁକାବିଲା କମିଟିର ମୁଖ୍ୟ ମୁଖପାତ୍ର ସୁବ୍ରତ ବାଗଚୀ କହିଛନ୍ତି ଆଉ ‘ଜନତା କର୍ଫ୍ୟୁ’ ପାଳନ କରିବାକୁ ରାଜ୍ୟବାସୀଙ୍କୁ ଅନୁରୋଧ କରିଛନ୍ତି ରାଜ୍ୟ ବିଜେପି ସଭାପତି ସମୀର ମହାନ୍ତି ।

‘‘କରୋନା ଭଳି ମହାମାରୀ ରୋକିବା ଦିଗରେ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ସବୁ ରାଜ୍ୟ ସରକାରଙ୍କୁ କରିଥିବା ଆବେଦନକୁ ଗ୍ରହଣ କରିଛନ୍ତି ଓଡ଼ିଶା ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ । ଏହାକୁ ରାଜ୍ୟବାସୀ ଗ୍ରହଣ କରିବା ସହ ଅନୁପାଳନ କରିବାକୁ ନିଜେ ମୁଖ୍ୟ ମନ୍ତ୍ରୀ ଅନୁରୋଧ କରିଛନ୍ତି,’’ କହିଛନ୍ତି ସୁବ୍ରତ ବାଗଚୀ ।

‘ଜନତା କର୍ଫ୍ୟୁ’ର ଅନୁରୋଧକୁ ରାଜ୍ୟବାସୀ ପାଳନ କରିବାକୁ ଅନୁରୋଧ କରିଛି ରାଜ୍ୟ ବିଜେପି । ଏକ ସାମ୍ବାଦିକ ସମ୍ମିଳନୀରେ ବିଜେପି ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, ‘‘କରୋନାକୁ ନେଇ ଜନସାଧାରଣଙ୍କୁ ପ୍ରଧାନ ମନ୍ତ୍ରୀ ଦେଇଛନ୍ତି ସଚେତନତାର ବାର୍ତ୍ତା । କରୋନା ସଂକ୍ରମଣ ରୋକିବା ଆମ ପ୍ରାଥମିକତା ହେବା ଉଚିତ । ତେଣୁ ରାଜ୍ୟବାସୀ ସଂଯମପୂର୍ବକ ଏହି ଅନୁରୋଧ ରକ୍ଷା କରି ପ୍ରଧାନ ମନ୍ତ୍ରୀଙ୍କ ଆହ୍ବାନକୁ ପାଳନ କରିବାକୁ ଅନୁରୋଧ ।  ଏହା ଦ୍ବାରା ଏକ ବଡ଼ ବିପତ୍ତିକୁ ଆମେ ଦୃଢ଼ତାର ସହ ସାମ୍ନା କରିପାରିବା  ।’’

କଂଗ୍ରେସ ମଧ୍ୟ ଏହି ଅନୁରୋଧକୁ ସମର୍ଥନ କରିବା ସହ ଏହା ଏକ ସମୟୋପଯୋଗୀ ପଦକ୍ଷେପ ବୋଲି କହିଛି । ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି: ‘‘ଏହା ଏକ ଉଚିତ ପଦକ୍ଷେପ । ସାରା ବିଶ୍ବରେ ଯେଭଳି କରୋନା ଏକ ମହାମାରୀରର ରୂପ ନେଇଛି ତାହା ଚିନ୍ତାଜନକ । ଏହାର ମୁକାବିଲା ପାଇଁ ସମସ୍ତେ ମିଳିତଭାବେ ପ୍ରୟାସ କରିବା ଦରକାର  । ମୁଁ ମଧ୍ୟ ସମସ୍ତଙ୍କୁ ଅନୁରୋଧ କରୁଛି ଯେ ସତର୍କ ହୁଅନ୍ତୁ, ସୁରକ୍ଷିତ ରୁହନ୍ତୁ । ଅନ୍ତତଃ ନିଜ ଘରୁ ଏହି ଉଦ୍ୟମ ସମସ୍ତେ  ଆରମ୍ଭ କରନ୍ତୁ ।  ନିହାତି ଆବଶ୍ୟକ ନ ଥିଲେ ପଦାକୁ ବାହାରନ୍ତୁ ନାହିଁ ।’’

ବିଜ୍ଞାନ ଓ କାରିଗରୀ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା କହିଛନ୍ତି: ‘‘ସମୟ ଆସିଛି ସମସ୍ତେ ଏକଜୁଟ୍‌ ହେବା ପାଇଁ । ସମସ୍ତେ ଏକାଠି ହେଲେ ହିଁ କରୋନାର ମୁକାବିଲା କରିହେବ । ଆବଶ୍ୟକ ନ ଥିଲେ ରବିବାର ବାହାରକୁ ବାହାରନ୍ତୁ ନାହିଁ । ନିଜର ଯତ୍ନ ସହ ଘର ଲୋକଙ୍କ ଯତ୍ନ ନିଅନ୍ତୁ ।’’

କେବଳ ରାଜନୈତିକ ଦଳଗୁଡିକ ନୁହନ୍ତି, ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କ ଏହି ଆହ୍ବାନକୁ ଜନସାଧାରଣ ଓ ବିଭିନ୍ନ ମହଲରୁ ମିଳିଛି ଭରପୁର ସମର୍ଥନ ।
First published: March 21, 2020, 8:45 PM IST